25 July 2021
13:36 - Юсуф Жума: Туркистон қаҳрамони Ботир Норбойга


ЭЛ -ЮРТ доғи боис дил доғларига,
Шу доғлари еди Ботир Норбойни.
Кураш майдонида - жанг чоғларида
Ўрни катта эди Ботир Норбойнинг.

Курашлардан келган шон даврасида
Унга бермасдилар тариқчалик жой.
Четда - бўсағанинг энг чеккасида
Жилмайиб турарди эр - Ботир Норбой…

Даврада қўр тўккан бир гала сотқин -
Урар пуч - юраксиз кўкракларига.
Жангда ўринсизлар ўриндор - мамнун,
Элни ишонтириб эртакларига…

Жангга кирмай - зинҳор талашманг ўлжа,
Унутманг, номардлар! Унутманг, барча :
Кураш чоғи бўлса - ўрнинггиз қанча -
Донг -номус кўшкида ўрнинггиз шунча!

Сўзим - Бош судянинг - Тангрининг сўзи -
Эй аҳли номуссиз, даврадан кетинг!
Улуғ Ботир Норбой - ёп - ёруғ юзли,
Шон - шараф кўшкининг тўрига ўтинг!!!

2021 йил, 21 июль.

* * * * *

Турон, ота юртим, бошимдир - пойинг,

Армоним - армонинг, войимдир - войинг.

Иккита бўлмади битта ботиринг –

Иккинчиси йўқдир Ботир Норбойнинг!

2018 йил, 9 июль.

* * * * *

Қон кўнглим, ўртанма - тиғланган тойдек,

Куртаклар жилмайди Ботир Норбойдек.

Руҳим, ерга чўкма - тош қотган лойдек,

Куртаклар жилмайди Ботир Норбойдек.


Курашиб бўлмас деб сотқин эл билан -

Ичида чўғи йўқ аҳли кул билан,

Эр баҳорга кўчган оқ кўнгил билан -

Куртаклар жилмайди Ботир Норбойдек.


Куртаклар - кўнглининг талқонларидир –

Очунни яшнатиш армонланидир,

Кўклам - Туркистону Туронларидир,

Куртаклар жилмайди Ботир Норбойдек.


Қанча овунтирмай юрагим абгор -

Худдики гуллаган ол щафтолизор -

Қип-қизил жилмайган яралари бор -

Куртаклар жилмайди Ботир Норбойдек….

2019 йил, 8 апрель.
« Олдинги хабар Хабарлар рўйхати Кейинги хабар »