01 June 2021
19:50 - Юсуф Жума: Ўғлини осиш учун осмонўпар дор тиклаган ота тўғрисида ривоят
Ўғлини осиш учун осмонўпар дор тиклаган ота тўғрисида ривоят

Уч ўғилни уч ота
Олиб келди оқилга -
Этар тўғри башорат -
Адашмасдан минг йилга...

Бири деди: - Улуғвор
Тангри сояси - доно!
Ўғлимни ўстирганман -
Бўлсин деб юртга подшо...

Боланинг манглайига
Тикилиб деди билган -
Ўғлинг бўлмас ҳукмдор,
Тўғри келмас бу элга...

Иккинчи эр мақташга
Лойиқ зотни мақтади.
Ўғлим шоҳ бўларми деб
Сукут ичра тўхтади.

Йўқ - йўқ! - деди донишманд, -
Фарзандинг бўлмас тождор.
Учинчи кишига дер: -
Боланг бўлар ҳукмдор!

Икки ота ўкинди,
Учинчи ота дер - дод!
Ўксинганлар дедилар -
Ўғлинг шоҳ бўлар - бўл шод!!!

Фиғон чекканча ота
Ташқарига югурди.
Куни бўйи фиғонда
Осмонўпар дор қурди.

Боласи - йигитчани
Келтирди дор остига.
- Осаман! Шоҳ бўлгунча
Кўмилсин ер остига!!!

- Нечун?! - деди оломон -
Додига тўпланганлар.
Подшо бўлса - бахтингку,
Кўп йўлин топмаганлар?!

Ўкинган икки ота
Келди эрнинг ёнига -
Биз дод десак бўлади -
Қолдик дил армонида.

Шоҳ бўлсин деб ўстирдик ,
Тақдир кўрмаскан раво.
Эр дер - болаларингнинг
Бири эр, бири доно!

Бетларидан аёндир ,
Қутлидирсизлар мунча?!
Бачча элга ҳукмдор
Бўлувчи бўлур бачча...

2021 йил, 30 май.
« Олдинги хабар Хабарлар рўйхати Кейинги хабар »