Аввалги хабарларимиздан маълумки, 31 март куни Туркияда бўлиб ўтган маҳаллий сайловларда бу мамлакатнинг 6 та катта шаҳаридан 5 тасида отатуркчиларнинг Жумҳурият Халқ Партияси (ЖХП) номзодлари миллатчиларнинг яқинда яратилган Яхши Партияси тарафидан ҳам қўллаб-қувватланилган ва ғалаба қозонган эди. Бу 5 та шаҳар ичида пойтахт Анқара ва Эгей Денгизи бўйидаги Измирдан ташқари, дунёнинг энг катта шаҳри Истанбул ҳам бор эди. Ундан ташқари, Сурия билан чегарага яқин Аданада ҳам отатуркчиларнинг номзоди ғалаба қозонган эди.

Эслатиш керакки, ҳозирги Президент Ражаб Эрдўған 1994 йили Истанбулда ҳокимликни қўлга киритган ва ўшандан бери бу шаҳарда исломчилар ҳокимлик қиларди.

Бу йилги сайловларда ЖХПнинг Истанбул номзоди Акром Имомўғли исломчиларнинг Эрдўған раислигидаги Адолат ва Ривожланиш Партияси номзоди, собиқ Бош вазир Бинали Йилдиримдан 0,2 фоиз фарқ билан ғалаба қозонди. Ўшанда исломчилар ҳозир бутун ҳокимият қўлларида эканлигидан фойдаланиб, Истанбулдаги сайловларнинг натижаларини бекор қилидиришга ва 23 июнга қайтадан сайлов ўтказиш қарори чиқаришга эришдилар.

Ўтган якшанба куни Акром Имомўғли ва Бинали Йилдирим Туркиянинг ҳамма телеканалларида намойиш қилинган теледебат ўтказдилар. “Ҳаракат” Агентлиги ўша теледебатлардан кейин, 23 июнда Акром Имомўғли янада катта фарқ билан ғалаба қозонишини башорат қилган эди. Мана, бугун АҚШнинг энг мушҳур хабар агентликларидан бири бўлган Reuters келаётган якшанба куни айнан Акром Имомўғли янада катта фарқ билан, тўғрироғи сал кам 10 фоиз фарқ билан ғалаба қозонишининг эҳтимоллиги катта эканлигини билдирди. Айни пайтда, 49 ёшли Акром Имомўғлини ҳозирги Президент Эрдўғаннинг бош душмани деб таништирди.

Хуллас, мана орада 1 кун қолди, бизнинг ва Reuters Агентлигининг башорати тўғри эканлигини бутун дунё кўради.

Reuters Агентлиги ўз хабарига Акром Имомўғлининг гўзал расмидан ташқари, Истанбулда унинг тарафдорлари ўтказаётган катта митингнинг расмини ҳам қўйган. Аммо, билмаганлар учун билдириш керакки, Reuters Агентлиги расмларини нусҳа қилиб олиб бўлмайди. Шу сабабли, биз бу ерга Акром Имомўғлининг бошқа бир расмини қўймоқдамиз.