05 January 2019
02:48 - Нью-Йорк Фондлар Биржасининг ўтган куни ўпирилиб тушган индекси Dow Jones кеча осмонларга сакради. Нима бўлди?
Машҳур Нью-Йорк Фондлар Биржасининг асосий кўрсатгичи бўлган Dow Jones индекси Доналд Трамп 2016 йил 8 ноябрдаги президентлик сайловларида ғалаба қозонган кунидан бошлаб мисли кўрилмаган даражада ортиб борганини ўз вақтида хабар қилган эдик. Аммо, 2018 йилнинг бошида Доналд Трамп аввал Хитойдан, кейин бир қатор Ғарб давлатларидан сотиб олинаётган маҳсулотлар учун қўшимча божхона солиғи киритишини эълон қилгач, Нью-Йорк биржасида кучли алғов-далғовлар бошланди. Dow Jones индекси катта зиг-загли сакрашларга кирди.

Бироқ, 3 октябрдан 24 декабргача Dow Jones индекси 26828 дан 21792 га, яъни 5 мингдан кўпроққа ўпирилиб тушди. Экспертларнинг фикрича, бундай тушишнинг сабаби – ташқи савдо соҳасида АҚШнинг Хитой ва Ғарб давлатлари билан қўшимча солиқ масаласида чиқишолмаслиги бўлди. Бундан ҳам қизиғи, 25 декабрь куни Dow Jones индекси тўсатдан осмонга сакрашга бошлади ва 1 январгача 23346 га чиқди. Яъни, бир ҳафталик ўсиш 1,5 минг бўлди. Бу 5 минглик тушишнинг сал кам учдан бири-ку!

Кейин маълум бўлдики, АҚШ ва Хитой президентлари телефонда гаплашиб, ташқи савдо масаласидаги чиқишмовчиликларни 3 ой ичида ҳал қилиш ҳақида келишишган экан.

Бу ҳақда 30 декабрда (2018 йил) “Ҳаракат” Агентлиги ҳам хабар тарқатиб, шундай таҳлил берган эди: “Агарда АҚШ ва Хитой раҳбарлари келишган бўлсалар, янги йил байрамидан кейин Нью-Йорк Фондлар Биржасида барқарорлик тезда тикланади ва биржанинг асосий кўрсатгичи бўлган Dow Jones индекси 2018 йил 3 октябрдан кейин бошланган 6 минглик ўпирилишни тиклаб олади.”

Аммо, 2 январда, яна кутилмаганда, Dow Jones индекси 660 поғанага тушиб кетди ва 22686 га тенг бўлди. Ўша куниёқ бундай тушишнинг сабаби ҳам маълум бўлди. АҚШнинг 30 та энг буюк ширкатларидан бири бўлган Apple INC Хитой ва бошқа ривожланаётган мамлакатларда бу ширкатнинг электроник (селфон ва шу кабилар) маҳсулотларини сотиш камайиб кетаётганини, демак, ширкатнинг бюджетида катта муаммолар бўлиши мумкинлигини эълон қилган ва шу сабабли Dow Jones индекси ўпирилган экан.

Тезда ҳамма тушундики, бу ширкат ваҳимани бўрттириб юборган, демак, ҳамма нарса ўз жойига тезда қайтади.

Кеча айнан шундай бўлди. Эрталабдан юқорига сапчиган Dow Jones индекси биржа бекилганда 747 поғанага юксалгани маълум бўлди. Шундай қилиб, бу индекснинг ўтган кунги ўпирилиши кечаги юксалиш билан қопланди. Ҳатто, 100 поғанача янада юксалиш бўлди.

Кўрамиз, шанба-якшанба кунлари ишламайдиган Нью-Йорк Фондлар Биржаси 7 январда очилганда, Dow Jones индекси юксалишни давом эттирадими?
« Олдинги хабар Хабарлар рўйхати Кейинги хабар »