Аввалги хабарларимиздан маълумки, Совет КГБсининг давомчиси бўлган Ўзбекистон ДХХси ҳозир АҚШ фуқароси бўлган ва ўз юртига уйланиш мақсадида келган ўзбек Зокир Алини, у гўёки 2000 йили Афғонистонга бориб, Ўзбекистон Исломий Ҳаракатига қўшилгани, 2002 йилгача Афғонистоннинг ҳукумат кучлари ва коалиция қўшинларига (АҚШ қўшинлари назарда тутилмоқда – "Ҳаракат") қарши жанговар ҳаракатларда иштирок этгани ҳақидаги иддаолар билан қўлга олинган эди.

Ҳозир мажбуран АҚШда яшаётган "Бирлик" Халқ Ҳаракати Партиясининг раиси Абдураҳим Пўлат Ўзбекистон ДХХси раиси Ихтиёр Абдуллага 20 июнь куни Очиқ Хат йўллаб, ўзи Зокир Али билан у Туркияда ўқиётган йилларидан бери таниш эканлигини, у ҳақиқий демократлигини, айнан ўзининг рекомендация хати билан БМТнинг Анқарадаги бюроси Зокир Алига "сиёсий қочқин" мақоми бергани ва у 1999 йилнинг охирги кунлари ёки 2000 йилнинг бошида АҚШга кўчиб келгани, унга қўйилаётган айблар ёлғон эканлигини урғулаб, уни озод қилиш кераклигини айтган эди.

Қаранг, бир кун ўтар-ўтмас, аниқроғи, 22 июндаёқ, ДХХчилар типирчилаб қолдилар ва Зокир Алини қўйиб юбордилар. Бу ҳақда ўша заҳоти қисқа хабар ҳам бериб, тафсилотларини кейин беришга ваъда қилган эдик.

Аслида, тафсилотлар бир неча дақиқадан кейин малум бўлди. Шуни айтиш керакки, Зокир ДХХ тарафидан 16 июнь куни ушлангандан кейин, Абдураҳим Пўлат унинг Қашқадарёдаги акаси Нурилло билан телефон орқали гаплашган эди. Зокир озод бўлгани ҳақида хабар келиши билан Абдураҳим Пўлат яна Нуриллога телефон қилди. Эндигина озод қилинган Зокир унинг олдида экан, Зокир билан гаплашди. Маълум бўлишича, уни шартли озод қилишган, унинг устидан тергов ишлари давом этади, унинг ўзи ҳеч қаерга кетмаслик ҳақида тилхат ҳам берибди. Аммо, ҳеч қандай айби йўқлиги сабабли, ҳамма нарса яхши бўлишига ишонаётганини ҳам урғулабди.

"Техник сабаблар билан алоқа яхши бўлмагани сабабли узоқ гаплашолмадик, аммо ҳамма нарса аён бўлди, - дейди Абдураҳим Пўлат. - Сталин яратган КГБнинг давомчиси бўлган Ўзбекистон ДХХси ўша эски руҳдаги ишларини давом эттирмоқда. Зокир Али Ўзбекистон Исломий Ҳаракатининг лидери, ҳозирда марҳум Тохир Йўлдошнинг укаси билан гўёки учрашгани унга қарши асосий далил сифатида ишлатилаётган эмиш. Куласизми, йиғлайсизми? Ахир менинг ўзим 1996 йили Истанбулда Тоҳир Йўлдош билан кўришганман. Мен уни куч ишлатиш йўлидан қайтаришга уриниб кўриш мақсадида учрашувга рози бўлганман. Унинг мақсади эса, мени ва мен раҳбарлик қиладиган "Бирлик"ни ўзларига тортиш экан. У яқинда Толибон билан биргаликда Ўзбекистонни қўлга олишларини, аммо Ғарб билан алоқалар яхши бўлиши учун, мендек одам Ўзбекистон президенти бўлиши кераклигини урғулаб, менга президентлик курсисини таклиф қилди. Аммо, биттагина шарти бор экан – Мудофаа вазири Жума Намангоний бўлади. Яна ўша савол: куласизми, йиғлайсизми?

Мен унинг президентлик таклифига “Йўқ” дедим, у эса, “Жавобингиз шундай экан, Муҳаммад Солиҳ билан учрашаман, унга айнан шу таклифни бераман” деди. Менинг жавобим шундай бўлди: “Ана бу тўғри иш бўлади, ҳеч қандай принципи бўлмаган у ифлос ҳамма нарсага тайёр”. Билмаганлар билиши керакки, асл исми-шарифи Салой Мадаминов бўлган бу ёзувчи “Муҳаммад Солиҳ” таҳаллуси билан кўпроқ танилган эди. Аммо, у 1989 йилнинг охирларида “Бирлик”нинг орқасига пичоқ уриб, ўзи Ислом Каримнинг хизматига ўтганидан кейин, ҳукуматдан мукофот сифатида олган квартираларининг номерлари (53-54) - унинг пешонасига сотқинлик рамзи сифатида ёпиштирилди. Исо пайғамбарни сотган Иудага “30 кумуш танга” лақаби умрбод ёпиштирлгани каби.

Мен буларни бугун биринчи марта айтаётганим йўқ, ўша пайтдаёқ булар ҳақида “Ҳаракат” журналида кўп марта ёзганман."

Абдураҳим Пўлатнинг ўзи бу гапларни хабар қилиб ўтиришга ҳам арзимайдиган нарса деб ҳисоблади, дейди мухбиримиз. Аммо бир қатор сафдошларимиз ҳозир тожиклар режими тарафидан тарбияланган ўзбек ёшларининг мутлақо кўпчилиги сиёсий саводсиз бўлиб қолгани, улар Ўзбекистонинг ҳатто кечаги кунларини ҳам билмасликлари, ватан ва миллатнинг муаммолари билан мутлақо қизиқмайдиган ҳолга туширилганларини урғулаб, буни хабар қилиш кераклигини айтишди. Ва биз бу фикрга қўшилдик.

Бу хабарга шуни қўшимча қилиш керакки, Ўзбекистонда ҳукмронлик қилаётган тожиклар режимининг ДХХси истаган пайтда Абдураҳим Пўлатни, унинг ўзи айтаётган гапларининг бир қисмигагина асосланиб, террористлар билан ҳамкорликда айблашини кутиш мумкин. Жойи келгани учун эслатамиз, Абдураҳим Пўлат 1989 йил 19 мартда ўзбекларни тарихда биринчи марта митингга олиб чиққанда, унга қарши “оммавий тартибсизликлар уюштириш” айби билан жиноий иш очилган, кейин бекитилган, аммо 1990 йилнинг март ойида бўлган Ўзбекистон Олий Советига сайловлар арафасида ҳаромий Ислом Карим ўша жиноий ишни қайтадан очтириб, Абдураҳим Пўлатни депутатликка сайлаттирмаган эди. Сайловлардан кейин у жиноий иш яна ёпилган. Чунки, ўша пайтдаги СССР қонунлари бўйича, устидан жиноий иш очилган одам сайловларда қатнашолмасди.

Ҳозирги ДХХ - Зокир Алига қарши тергов ишларини давом эттириши, ишни судгача олиб чиқиши мумкин, лекин ҳеч нарсага эришолмайди, чунки, бунга ҳеч қандай асос йўқ. Аммо, тушиниш керакки, Зокир Али Шавкат Мирзиё раҳбарлигидаги тожиклар режими учун баҳона холос. Асл нишон – Ўзбекистон давлати ва ўзбек миллатини тожиклар режимидан қутқариш учун ҳаракат қилаётган “Бирлик” ва унинг раҳбариятидир.