Аввалги хабарларимиздан маълумки, 16 апрелда Туркиянинг Конституциясига Туркияни президент давлатига айлантириш, президентга диктаторлик даражасидаги ваколатлар бериш ҳақида ўзгартиришлар киритиш масаласи бўйича умумхалқ референдуми ўтказилади. Халқ бундай ўзгартиришларга “Ҳа” ёки “Йўқ” деб жавоб бериши керак. Турли сўровномаларда мутлақо турли натижалар чиқаётгани ҳам жуда қизиқ.

Масалан, бугун Туркиянинг энг катта газетаси “Миллиёт” хабар қилишича, Одил Гур (Adil Gür) исмли тадқиқотчи раҳбарлигида ўтказилган сўровномаларга кўра, сайловчиларнинг 60,8 фоизи референдумда “Ҳа” демоқчи, “Йўқ” дейдиганлар 39,2 фоиз. “Жумҳурият” газетаси эса, отатуркчиларнинг Жумҳурият Халқ Партияси тарафидан ўтказилган сўровномаларнинг натижаларини эълон қилди. Уларга кўра, сайловчиларнинг 43,6 фоизи “Ҳа” демоқчи, 56,4 фоизи “Йўқ” демоқчи.

Эслатиб ўтамиз, АҚШда ўтган йилги президент сайловларининг олдидан ўтказилган ҳамма сўровномаларда Ҳиллари Клинтон олдинда, Доналд Трамп орқада эди. Сайловда эса, “Ҳаракат” ва “Бирлик” лидери Абдураҳим Пўлат башорат қилиб келганидек, Доналд Трамп ғалаба қозонди. АҚШдек демократик давлатда сўровномаларга ишонч йўқолиб борар экан, Туркиядек тўла демократик деб бўлмайдиган давлатда нималар кутиш керак?

Мен, дейди Абдураҳим Пўлат, туркларни референдумда “Йўқ” деб овоз беришга чақирганимдан ҳам кўриниб турибдики, бундай ўзгартиришларнинг қабул қилинишини истамайман, бу ўзгаришлар Туркияни парчаланишга олиб бориш эҳтимоллигини кескин оширишини кўриб турибман.

Лекин, индинга рефрендумда қандай натижа чиқишни айтиш жуда ҳам қийин. Агар “Ҳа” дейдиганлар ғолиб чиқса, Туркияни тўла исломлаштириш ниятидаги ражаб-эрдўғончилар билан дунёвийчилик/секуляризм тарафдори бўлган отатуркчилар ўртасидаги кураш яна ҳам шиддатлашади. Бутун дунё демократлари, муҳим бўлгани, Турк Дунёсининг дунёвийлик/секуляризм тарафдорлари отатуркчиларни қўллаб-қувватлашлари ва ёрдам беришлари керак.

Референдумнинг логосига айланган расмдаги туркча ““Evet” ва “Hayır” сўзлари ўзбекча “Ҳа” ва “Йўқ” деганидир.