03 April 2017
19:33 - Дипломатик мулозаматми ёки эътироф: АҚШ президенти Доналд Трамп Шавкат Мирзиёни олқишлаган эмиш
АҚШ президенти Доналд Трамп Ўзбекистоннинг янги президент Шавкат Мирзиё томонидан амалга оширилаётган ислоҳотларда катта ўзгаришлар сезилаётганини олқишлади, дейилади ўрисларнинг РИА “Новости” агантлиги тарқатган хабарда. "Ўзбекистон Президенти этиб сайланганингиздан сўнг Сизнинг раҳбарлигингизда мамлакатнинг барча соҳаларида амалга оширилаётган кенг кўламли ислоҳотлар ва тараққиёт жараёни бизни ҳам мамнун этмоқда", - деган эмиш Доналд Трамп Шавкат Мирзиёни Наврўз байрами билан қутлаб.

Доналд Трамп ўзининг табрик хатида Америка халқи ва бизнеси вакиллари Ўзбекистон билан ҳамкорликни янада чуқурлаштириш йўлларини излаётганини ҳам қайд этган. Шавкат Мирзиё ҳам мактубга жавобан АҚШ президентининг шахсий эътиборини юқори баҳолаб, келажакда Тошкент ва Вашингтон орасида турли соҳаларда, жумладан бизнесда ҳам ҳамкорликни мустаҳкамлаш тарафдори эканлигини ҳам айтган.

Маълумки, аввал Россиянинг расмий давлат хабар агентлиги бўлган РИА “Новости” ҳозир Ғарбга қарши пропаганда олиш ниятида яратилган “Россия Бугун” агентлигига берилган ва бу агентликдан холис хабарлар кутиш соддалик бўларди. Тахмин қилиш мумкинки, Доналд Трампнинг расмиятчилик учун юборилган табрикномасида Шавакт Мирзиёнинг ислоҳотлар ўтказиш ҳақидаги ваъдалари олқишланган. Чунки, ҳали ҳеч қандай ислоҳот бошланмаганини ҳамма билади.

Қолаверса, РИА “Новости” Наврўз байрами нишонланганига 2 ҳафтa ўтиб,сумалаклар еб бўлингандан кейин Доналд Трампнинг табирикномасини кўриб қолганига қойил қолиш керак.
« Олдинги хабар Хабарлар рўйхати Кейинги хабар »