Аслида тишни АҚШ Президенти Доналд Трамп эмас, Давлат Котиби Рекс Тиллерсон кўрсатди, Россия ва Хитойга эмас, Шимолий Кореяга кўрсатди. Аммо, ўз-ўзидан маълумки, бундай тиш қайраш аслида Шимолий Кореянинг ўзига эмас, унинг стратегик ҳамкорлари Хитой ва Россияга қаршидир, Рекс Тиллерсон эса Доналд Трампнинг фикрларини айтмоқда.

Осиё бўйлаб чоршанба куни саёхатини бошлаб, аввал Японияда бўлган, бугун Жанубий Кореяга келган ва эртага Хитойга ўтадиган Рекс Тиллерсон Сеулда Жанубий Кореянинг Бош вазири, айни пайтда президент вазифасини вақтинча бажарувчи Хван Гёан билан учрашди, Шимолий ва Жанубий Корея ўртасидаги қуролли кучлардан бўшатилган ва ҳозир тинч аҳолси ҳам кўчириб кетилган зонага ташриф буюрди, сўнгра Хван Гёан билан бирга матбуот конфренцияси ўтказиб, Шимолий Кореяга нисбатан йиллардан бери олиб борилаётган сабр-тоқат сиёсати битганини эълон қилди.

Мана унинг айтган гаплари: “Рухсат беринг, шуни очиқча айтмоқчиманки, стратегик сабр-тоқат сиёсати битди, биз хавфсизлик соҳасида янги ишлар қилишни, жумладан дипломатик йўналишда ишлар қилиш масаласини ўрганмоқдамиз. Ҳамма вариантлар оолдимизда. Шимолий Кореянинг Жанубийга таҳдидларига ҳам керакли жавоб берилади”. Тахмин қилиш мумкинки, Рекс Тиллерсон ва Хван Гёаннинг учрашуви пайтида Шимолий Кореяга қарши қилинадиган ишлар жиддий шаклда тилга олинган.

Маълумки, йиллардан бери Хитой ва Россиянинг ёрдамида узоққа учадиган ракеталар ва ҳатто ядровий бомбалар яратиб, уларни такомиллаштириш билан шуғулланаётган, АҚШнинг ўша минтақадаги стратегик ҳамкори Япония ва Жанубий Кореяга, ҳатто АҚШнинг ўзига дўқ-пўписалар қилишдан ҳам чекинмаётган Шимолий Кореяга қарши АҚШ тарафидан баъзи санкциялар киритилган бўлса ҳам, унга қарши жиддий бир нарсалар қилинмасди. Агар Рекс Тиллерсон бугунги баёноти жиддий бўлса, энди қилинади.

Қаранг, дейди мухбиримиз, бор-йўғи 5 кун аввал, аниқроғи 12 март куни “Ҳаракат” Агентлиги тарафидан тарқатилган “Россия-Туркия-Ғарб муносабатлари аянчли ва ғариб аҳволда. Ўзбекларга нима?” номли хабар- таҳлилда шундай деб ёзилганди: “Бизга нима, деб ўйлайдиган ўзбекларга эслатиш керакки, ҳеч нарса ўзгармаса, ҳозир дунёда бўлаётган бу машмашалардан, АҚШ ва Ғарбий Европада бўлаётган ички машмашаларни ҳам ҳисобга олмоқдамиз, Хитой ғалаба билан чиқади. Россиядан қутилиб, Хитойнинг вассалига, балки, замонавий мустамлакасига айланишга тайёрланаверишимиз керакми?”. Яъни, яқин келажакда дунёда лидерлик Хитойга ўтиши мумкинлиги башорат қилинганди.

Демак, АҚШда ҳам жараёнларнинг шу йўналишда кетишини тушунишмоқда ва, биринчи навбатда, Шимолий Корея билан шуғулланишмоқчи.