Бугун Туркия оммавий ахборот воситалари, жумладан, Миллиёт газетаси хабар қилишича, Машина ва Кимё Саноати номли структураси тарфидан ишлаб чиқарилган 500 дона MPT-76 маркали милтиқ Туркия армиясига топширилибди. MPT - Modern Piyade Tüfeği (ўзбекчасига – Замонавий Пиёда Милтиғи) сўзларининг қисқартирмасидир.

Хабарларда айтилмаса ҳам тушуниш мумкинки, турклар бу милтиқни АҚШ ва Россияда узоқ йиллардан бери ишлатиб келинаётган ва бутун дунёга сотилаётган милтиқлар асосида яратиш мумкин. Шундай бўлса ҳам, бундай милтиқларни юз йиллардан бери Ғарбдан сотиб ёки ўғирлаб олиб келиб ишлатаётган мусулмонлар 21 асрга келиб, ўзларида милтиқ чиқаришни бошлаганлари олқишга сазовордир.

Бу кетишда, жуда яқинда Ислом дунёсининг қолоқ ва қашшоқлиги ҳақида гапираётган Абдураҳим Пўлат шарманда бўлиши муқаррар. Чунки, 21 асрга келиб ўз милтиқларини яратолган турклар яна минг йил ҳам ўтмасдан ўз сунъий йўлдошларини ҳам ишлаб чиқаришга бошлайдилар. Ишқилиб, ўша пайтгача, Ернинг ўлаётганини тушунган ғарбликлар бошқа планетгаларга кўчиб кетишмасин.

Қолаверса, Абдураҳим Пўлат ўзини оқлаб олиши ва Туркиядаги бундай муҳим ютуқларда ўзининг ҳам роли борлигини кўрсатувчи қуйидаги мисол бор. Айнан у 1993 йили Истанбулда ўзбекнинг буюк ўғлони Боймирза Ҳайитнинг 85 йиллигига бағишланган йиғилишда шундай деган эди: “Турк дунёси ўзининг атом бомбасини яратиш устида ўйлайдиган вақт келди”. Айнан шундан кейин турклар ўз милтиқларини ишлаб чиқариш устида иш бошлашмадимкан?