06 January 2017
21:13 - Трампнинг инаугурациясидан сўнг ҳам АҚШнинг Ўзбекистондаги элчиси ўзгармайди, чунки, биз билан ҳеч кимнинг иши йўқ
New York Times нашри ҳали президентлик курсисига ўтирмаган Доналд Трампнинг талаби билан АҚШнинг дунёдаги турли мамлакатларда фаолият юритувчи элчиларнинг кўпроқ сиёсий сабаблар билан тайинланганлари ўз вазифаларини топшириб, ватанларига 20 январга қадар етиб келишлари кераклиги ҳақида ёзди. Моҳиятан янги президент элчиларни қайтадан тайинлайди, дипломат ва сиёсий амалдорларга қайтадан тартиб беради. Шу муносабат билан Ўзбекистондаги Кун.Уз нашри АҚШнинг Ўзбекистондаги элчиси тақдири билан қизиқиб, элчихонага боғланган.

“Биз элчи Спратлен АҚШнинг Ўзбекистондаги элчиси бўлиб ўз хизматини давом эттиришини кутмоқдамиз. Элчи Спратлен карьера дипломати ҳисобланади. Бу эса уни сиёсий тайинлов билан лавозимга киришганлардан фарқли равишда, президентнинг 20 январь кунига белгиланган инаугурациясига қадар истеъфога чиқиш бўйича амалдаги талаблардан озод этади” дейишибди элчихона ходимлари.

Кўринишидан, сиёсий сабаблар билан эмас, касби дипломат бўлгани учун элчи қилиб тайинланган ва бу вазифани 2014 йилнинг 18 декабрдан бери бажариб келаётган Памела Спратлен ўз лавозимида қолади. Қолаверса, Доналд Трамп АҚШнинг мамлакатимиздаги элчисини қўйиб туринг, инидан чиқмайдиган Ислом Карим президентлик қилган йиллари ҳамманинг эсидан чиқиб бўлган Ўзбекистоннинг ўзи билан ҳам қизиқмаса керак.
« Олдинги хабар Хабарлар рўйхати Кейинги хабар »