04 January 2017
02:35 - Туркияда Фавқулодда Ҳолат иккинчи марта 3 ойга узайтирилди, исломчиларни ҳокимиятдан тезроқ улоқтириш керак
Туркияда 2016 йилнинг15 июль куни кечаси давлат тўнтаришига уриниш мағлубиятга учрагач, бу мамлакатнинг парламенти, яъни Туркия Буюк Миллат Мажлиси 3 ойлик Фавқулодда Ҳолат эълон қилиб, 11 октябрда уни яна 3 ойга, яъни 2017 йилнинг 19 январигача узайтирган эди.

Кеча ярим кечасига яқин Туркия Буюк Миллат Мажлиси мавжуд исломчилар ҳукуматининг Фавқулодда Ҳолатни яна 3 ойга узайтириш таклифини қабул қилди. Ҳукуматнинг шошма-шошарлигини ҳам тушуниш мумкин. Мамлакатда Фавқулодда Ҳолатга қарши кайфият кучайиб борар экан, Фавқулодда Ҳолатни яна узайтириш масаласи атрофида катта тўпалонлар бўлиши муқаррар эди.

Ҳозир эса, бутун Туркия янги йилнинг биринчи соатларида Истанбулнинг марказида тунги кўнгил очар клубидаги даҳшатли террористик актда 39 кишининг ўлдирилиши шоки остида экан, параламентда Фавқулодда Ҳолат яна бир марта узайтирилаётгани билан ҳеч кимнинг иши ҳам бўлмади, десак бўлаверади. Қолаверса, Туркия парламентида исломчиларнинг Адолат ва Тараққиёт Партияси оддий кўпчиликка эга бўлгани, бундай қарорлар учун оддий кўпчилик етарли эканлигини ҳам ҳисобга олиш керак.

Маълумки, мамлакат Конституциясига ўзгартиришлар киритиш учун параламентда 2/3 кўпчиликка эга бўлиш керак. Президент Ражаб Эрдўғон ҳамда унинг Адолат ва Тараққиёт Партиясининг орзуси шундай кўпчиликка эришиш ва Туркияни исломий давлат деб эълон қилишдир. Фатхулла-гуленчиларнинг ҳам орзуси айнан шундай. Аммо, ражаб-эрдўғончилар билан фатхулла-гуленчилар ўртасида тахт учун кураш доирасида чиққан уруш сабабли, бу орзу амалга ошмаяпти, энди ошмаса ҳам керак.

Шундай экан, Туркиядаги дунёвийчилик тарафдорлари вақтдан фойдаланиб, ўрта асрлар менталитети билан яшайдиган исломчиларни ҳокимиятдан улоқтиришлари керак. Акс ҳолда, Туркия лидерлигидаги Турк Дунёси ҳам оғир аҳволда қолади.
« Олдинги хабар Хабарлар рўйхати Кейинги хабар »