22 February 2015
07:34 - Ғарб Россияга қарши янги санкциялар киритмоқчи, Украинада жонли, дунё бўйлаб совуқ уруш кучаяди
“Ҳаракат” Агентлиги аввалдан башорат қилганидек, 11 февралдан 12-чига ўтар кечаси Минскда ўтказилган “Нормандия тўртлиги” саммити қарорлари бажарилмади. Феълан Россиянинг қўшинлари деса бўладиган Донецкли жангарилар 15 февралда кучга кирган ўт очишни тўхтатиш бўйича келишувга қарамасдан, Луганск ва Донецк ўртасидаги Дебальцево шаҳри атрофида қуршовда бўлган Украина қўшинларига қарши ҳужумларни тўхтатмадилар. Россия у ерга янги қуроллар юборгани ҳам айтилди, ҳатто буни АҚШ расмийлари тан олдилар. Хуллас, Украина қўшинлари у ердан катта талофатлар билан чекинишга мажбур қилинди. Бундан руҳланган жангарилар янги ҳужумларга ўтиши кутилмоқда.

АҚШ Давлат Котиби Жон Керри Европа Иттифоқи давлатлари билан Россияга қарши янги санкциялар киритиш бўйича маслаҳатлашилаётгани билдирди. Демак, бундай санкциялар тез кунда эълон қилинади. Айни замонда, республикачилар кўпчиликни ташкил қилувчи АҚШ Конгресси Барак Обамадан Украинага қурол бериш талабларини кучайтирмоқда. Сенат Қуролли кучлар комитетининг раиси, Путинга ўта салбий муносабатда эканлиги билан танилган Жон МакКейин Украинага летал қурол, яъни фақат мудофаа учун эмас, ҳужум ва душманни йўқ қилиш учун ишлатиладиган қурол бериш кераклигини айтмоқда. Агар Барак Обама бундай қилмаса, Қуролли кучлар комитети уни бундай қадамга мажбурловчи қарор ҳам чиқариши мумкин.

Барак Обама бу масала бўйича ўз қарорини тез кунларда эълон қилишини Жон Керри кеча Лондонда билдирди. У Буюкбритания ташқи ишлар вазири Филлип Хэммонд билан Украина масаласини гаплашди ва Россиянинг Ғарбга тупириши кечирилмаслигини урғулади.

Россия Президенти Владимир Путин ҳозирги босқичда орқага чекинмоқчи эмаслигини очиқча кўрсатмоқда. Демак, Украинада уруш давом этаверишидан ташқари, дунё даражасида совуқ уруш авжига чиқаверади. Бу совуқ уруш ҳам, аввалгиси каби, Ғарбнинг ғалабаси билан тугалланиши муқаррар. Аввалги уруш СССРнинг парчаланиши билан тугаган эди, буниси Россия Федерациясининг парчаланиши билан битади. Лекин унгача кўп қон тўкилади. Боши берк кўчага кириб қолган Путин ислом терроризмини қўллаб-қувватлашга ҳам ўтиши мумкин. Аммо, бу ҳолда унинг Хитойдек иттифоқчиси билан алоқалари ёмонлашиши шубҳасиз.
« Олдинги хабар Хабарлар рўйхати Кейинги хабар »