03 December 2014
22:12 - Шармандага шаҳар кенг: Ўзбекистон коррупция масаласида кулгили даражада ижобий натижага эришибди
Бугун ҳукуматнинг бир қатор қўғирчоқ веб нашрлари Ўзбекистонда коррупция масаласида бирмунча ижобий натижа қайд қилгани ҳақида оғиз кўпиртириб ёзишибди. Масалан, Кун.Уз ва Газета.Уз сайтлари Transparency International халқаро аксилкоррупция ташкилоти тарафидан 2014 йил учун эълон қилинган Коррупцияни идрок этиш индекси (Corruption Perception Index) рўйхатида мамлакатимиз ўтган йилги 168-ўриндан бу йил 166-ўринга юқорилаганини билдиришибди. Ҳа, ростдан ҳам шундай, аммо 175 та мамлакат ичида 166-чи ўринни олиш, охиридан 9-чи ўрин олишку.

Дарвоқе, Ўзбекистон Эритрея ва Ливия каби мамлакатлар билан ёнма-ён эканлиги, МДҲ давлатлари ичида Туркманистон билан бирга ҳаммадан орқада эканлиги ҳам аҳволимиз қандай ғариб эканлигини кўрсатиб турибди.
Ўзбекистондаги веб нашрларнинг баҳосидан кулишни ҳам, йиғлашни ҳам билмайсан киши. Агар мамлакатимиз коррупция даражаси бўйича йилига икки ўринга кўтарилаверса, яна 60-70 йилларда олтин ўрталикка келиб қоларканмиз.

Аммо, бир нарсани тушуниш керакки, коррупция билан курашишнинг ягона йўли – жамиятни демократиялаштиришдир. Шундай экан, Ўзбекистон ташқарисидан туриб коррупцияга қарши курашмоқчи бўлган аҳмоқ ўзбеклар борлиги - яқин орада бизда ижобий ўзгаришлар кутиш керакмаслигининг кўрсатгичидир. Демак, бу масалада ҳам ҳамма умид Ўзбекистон ичида фаолият олиб бораётган ягона мухолифт ташкилоти - “Бирлик” Партиясидадир.
« Олдинги хабар Хабарлар рўйхати Кейинги хабар »