Бу ҳақда ҳеч қандай расмий хабар тарқатилгани йўқ. Аммо, gazeta.uz сайти бу вазирликнинг расмий сайтида вазир лавозими вакант эканлиги ёзилганини билиб қолибди. Бўлиши мумкин. Лекин, мавжуд режимнинг қўғирчоқ ахборот воситаларидан бири бўлмиш gazeta.uz буни билиб қолса ҳам, юқорининг рухсатисиз ҳеч нарса эълон қилмаслигини аҳмоқ ҳам тушунади.

Нима бўлса ҳам, ўтган йилнинг 25 апрелида бу лавозимга келтирилган Минҳожиддин Мирзо энди у ердан улоқтирилгани ростга ўхшайди. Аммо, бу одам Ўзбекистонда маданият ёки спортни юксалтириш учун бирон нарса қилдими? Йўқ қилган эмас, қиладиган одам ҳам эмасди.

У вазир этиб тайинланганда, “Ҳаракат” агентлиги бу хабарни шундай таҳлил қилган эди:

“Кўпчилик ўзбек ёзувчилари каби мавжуд режимнинг маддоҳи бўлган 41 яшар Минҳожиддин Мирзо 2012 йилнинг ўрталарида Ўзбекистон телерадиокомпанияси раисининг биринчи ўринбосари этиб тайинланганди. Ундан аввал “Шарқ юлдузи” журналининг Бош редактори, Президентнинг Давлат маслаҳатчиси ўринбосари каби лавозимларда ҳам ишган.

У Ислом Карим раҳнамолигида “юксак маънавият”га эришганимизни таъкидлаб мақолалар ёзган. Лекин Қирғизистонда ўзбеклар тириклайин ёқилиб, ўзбек аёллари қирғизлар тарафидан тўдалашиб зўрланганда, ўзбеклар қирғин қилиниб, қирғин сабабчилари четда қолиб яна ўзбеклар қамоқларга отилаётганда унинг “юксак маънавияти” ўзини писиб ўтиришга мажбур қилган. Бизда шунақа маънавият.”

Хуллас, бу “маънавиятчи” ишдан четлатилгани билан бизда маданият ва спорт соҳасида ҳеч нарса ўзгармайди. Ўзбекларни аввал “Бош маънавиятчи”, тўғрироғи маънавитсизлик раҳнамоси Ислом Каримдан қутқариш керак.