20 August 2014
12:26 - Бельгияда кайфли мулозим Қатар маликасининг юз ниқобини суғуриб олди, иккаласи ҳам жазоланиши мумкин
Huffington Post газетасининг Францияда чиқадиган франчузча версиясида берилган хабарда айтилишича, воқеа шундай бўлган. Брюссель ҳокимлигининг мулозими Жан-Мари Пир бир оз кайф билан кўчада кетаётганда, юз ниқобли 3 ёш аёл ундан қаергадир бориш йўлини сўрашибди. Жавоб ўрнига, Бельгияда ниқоб тақиқланганини айтган Жан-Мари Пир, сўраган аёлнинг ниқобини юзидан суғуриб олибди. У бироз қўполроқ ҳаракат қилган шекилли, ниқоб билан бирга у аёлнинг қулоғидаги зирак ҳам суғирилиб, қулоқ атрофи тирналибди.

Маълум бўлишича, у аёл Қатар маликаси экан. У Жан-Мари Пир устидан шикоят қилиб, судга ариза берибди.

Қўполлик қилгани учун Жан-Мари Пир жазоланиши мумкин. Аммо Бельгияда жамоатчилик жойларида паранжи ёки юз ниқоблари тақиқлангани сабабли, Қатар маликасига жарима солиниши ва 7 кунгача қамалиши муқаррарга ўхшайди.
« Олдинги хабар Хабарлар рўйхати Кейинги хабар »