Кеча маҳаллий вақт билан кечқурун Украина осмонида, аниқроғи, Донецк вилояти устида, Голландия пойтахти Амстердамдан Малайзия пойтахти Куала-Лумпурга учиб кетаётган Malaysia Airlines компаниясига оид йўловчи Боинг-777 учоғи ракета билан уриб туширилди. Учоқдаги 280 йўловчи ва 15 кишидан иборат учоқ экипажи ҳалок бўлди. Учоқ 10 километрдан ҳам юқорида урилди, демак, уни ёки биронта ҳарбий учоқдан ёки ердан отилган қувватли ракета билан уришган.

Ҳали тўла аниқ бўлмаган маълумотларга кўра, учоқ Россия армиясида ишлатиладиган “Бук” ракетаотари ёрдамида уриб туширилган. Руслар бундай қуролларни Донбасда ҳокимиятни қўлга олган сепаратист-террористларга беришгани айтилмоқда.

БМТ, НАТО, ЕИ раҳбарлари бу ҳалокат тўла ўрганилиши, айбдорлар жазоланиши шартлигини гапирмоқдалар. Россия расмийлари эса, табиий, учоқ Украина тарафидан уриб туширилганини иддао қилмоқдалар.

Нима бўлганда ҳам, бу даҳшатли воқеа кўрсатмоқдаги, Россия президенти Владимир Путин тарафидан Украинага қарши бошланган кампания ростакам урушга айланиб, халқаро майдонга тарқалмоқда. Юзлаб бегуноҳ одамлар ҳалок бўлмоқда. Ҳамма айб – Совет империясини тиклаш фикридан воз кечолмаётган Россияда, унинг президенти Путинда.

Ростдан ҳам, бу учоқнинг уриб туширилиши Россия ва унинг раҳбари Путинни разил қилди. Ҳозирги Россия ва Путин қон сўрувчи вампир сифатида тарихга кирадилар.