Тошкент вақти - 
21 June 2014
07:43 -
Нью-Йорк фондлар биржаси тарихий рекордлар урмоқда, ўзбеклар ҳам бу атмосферада яшашни ўрганишлари керак
Нью-Йорк фондлар биржасидаги аҳвол ҳақида охирги марта 2 ҳафта аввал ҳабар бергандик. Ўшанда биржанинг асосий кўрсатгичи бўлмиш Dow Jones индекси 16924 га тенг эди. Ўтган 2 ҳафтада бу кўрсатгич, Ироқдаги воқеалар туфайли, 250 поғонадан ҳам кўпроққа тушиб кетди. Бироқ, унинг қулоғига Ироққа кўп эътибор берма деб шивирлашди, шекилли, тезда ўзини эплаб олди.Охирги иш куни кеча тамом бўлган жорийдаги ҳафтани Dow Jones индекси 16947 билан битирди. Бу – яна тарихий рекорд.
Кўп марта таъкидлаганимиздек, фондлар биржасининг бундай ўсиши – АҚШнинг катта компаниялари мустаҳкамаланаётганини, уларнинг акцияларини нархи мисли кўрилмаган даражага чиққанини кўрсатмоқдадир.
Бундай шароитда америкаликлар учун, ҳозир бу мамлакатда яшаётган ўзбеклар учун ҳам, пулларини банкларда эмас, компанияларнинг акцияларида сақлаш ўта фойдалидир. Масалан, банкда 10 минг доллар пули бўлган одам май ойида кўпи билан бир неча ўн долларлик фойда олди. Пулини стокда, яъни акцияларда сақлаган одам эса, май ойида тахминан 300 (!!!) долларлик фойда олди. Фарқи борми?
Аввал ҳам кўп марта такрорлаган фикримизни яна қайтарамиз.
АҚШда ишлаётган ўзбеклар фондлар бозорида кетаётган жараёнлар билан қизиқишлари, қўл билан ушлаб бўлмайдиган, кўзга кўринмадиган Dow Jones каби индекслар билан яшашни ўрганишлари, пулларини фақат банкларда эмас, фондлар бозорининг акцияларида ҳам сақлашни ўрганишлари лозим.
Ўзбекистондаги ота-оналарга ёрдам бериш шарт, аммо у ерга ортиқча пул юбориш ўзбекларнинг душмани бўлган мавжуд режимга хизмат қилиш ва пулни сувга оқизишдир. Ўзбеклар АҚШда ҳам ош ейиш ва Ўзбекистонга пул юборишдан ташқари, бу ерда пул йиғиб, кичкина бўлса ҳам ўз бизнесларини очиш устида ўйласалар фойдали бўлади.
Айнан шундай одамлардан кейинчалик катта бизнесменлар чиқади. Ана ундан кейин Ўзбекстонда ҳам бизнес очишни ўйлаш мумкин. Акс ҳолда, Американи ҳам мардикорлар билан тўлатиб юраверамиз.
