Аслида МДҲга кирувчи давлатларнинг бош вазирлари навбатдаги учрашувларини 2014 йилда МДҲга раислик қилаётган Украинанинг пойтахти Киевда ўтказишлари керак эди. Аммо, 22 февралда Украинада ҳокимият ўзгаргандан кейин, Киев МДҲда раисликдан воз кечди, раисликни Белорусия ўз бўйнига олди. Энди Украина МДҲнинг ўзидан ҳам чиқмоқчи, бироқ, бунинг учун камида 1 йил вақт керак.

Русларнинг Новости агентлигига кўра, бугун Минскда бош вазирлар МДҲда ижтимоий-иқтисодий ривожланиш ва инновацион ҳамкорлик масалаларини муҳокама қилишар экан.

Қаранг, МДҲнинг аъзосигина эмас, унинг 2014 йилдаги раиси бўлган Украинада уруш кетмоқда. Аслида, уруш ички уруш эмас, феълан Россиянинг иштирокидаги урушдир. Демак, МДҲга кирувчи давлат раҳбарлари аллақачон саммит ўтказиб, бу урушни тўхтатиш масаласини муҳокама қилишлари керак эди. Саммит бўлмаса ҳам, бугун Белорусия пойтахти Минскда бош вазирлар тўпланар экан-да, Белорусиянинг қўшниси Украинадаги қонли воқеаларни кўрмаётгандек, социал-иқтисодий муаммоларни муҳокама қилар экан.

“Бирлик” лидери Абдураҳим Пўлат қирғиз фашистлари ўзбекларни қирғин қилганда оғзини ҳам очмаган МДҲни ўлик ташкилот деб атаган эди. Бугун кўриб турибмизки, МДҲ ростдан ҳам аллақачон ўлиб бўлган экан.