24 April 2014
19:13 - Украинадаги воқеаларнинг марказига айланган Славянскни федералист/сепаратистлардан тозалаш тўхтатилди, Абдураҳим Пўлат буни тўғри қадам дейди
Украина ҳукумати Пасха муносабати билан Украинанинг жанубидаги волоятларни Россия тарафидан тузилган ва бошқарилаётган сепартист-террористлардан тозалаш ҳаракатини вақтинчи тўхтатиб қўйганди. Ҳозир бу ҳаракатлар қайтадан бошланган. Масалан, бугун Славянск шаҳридаги руспараст жангарилар тарафидан қурилган 3 та блокпост йўқ қилинди, жангарилардан 5 киши ўлдирилди.

Россия дарҳол Украина чегарасига яқинига аллақачон олиб келинган ҳарбий кучларини оёққа турғазди. Уларнинг Украинага ҳужум қилиш эҳтимоллиги ортгани сабабли, Украина Ички ишлар вазирлигининг қўшинлари сепаратистларга қарши бошлаган оперецияларини вақтинча тўхтатдилар.

Ғарбнинг Россига таҳдидлари ортмоқда. АҚШ янги санкциялар киритишдан ташқари, Украинага яқин ерларга ўз қўшинларини олиб келиш ниятида эканллигини айтмоқда. Яъни, совуқ уруш ҳам авжига чиқмоқда.

Россия иқтисоди ва замонавий ҳарбий техникасининг даражаси бўйича АҚШдан жуда орқада. Аммо, унинг эски бўлса ҳам, дунёни йўқ қилиб юборишга қудрати етадиган ядровий қуроллари бор. Айнан шуни назарда тутган “Бирлик” лидери Абдураҳим Пўлат Россия-Гуржистон урушидан кейин ёзган “Кенигсберг-Курил муаммолари ва Россия- Гуржистон уруши” номли мақоласида шундай дейди:

“Яна бошқа бир ҳақиқат шундан иборатки, Россия бугун ўз империясини қўриқлашга кучи етади. Совет замонида аввалига милионлаб одамларни йўқ қилган, қолганларни қуллар каби ишлатиш системасини яратган СССР номи остидаги Россия империяси бутун дунёга таҳдид сололадиган ядровий потенциал эга эди. У потенциал ҳозир ҳам сақланиб турибди.

Ҳозирги Россияни Ўрта Шарқ мамлакатларида модага кирган тирик бомба-аёллар билан солиштириш мумкин. У бомба-аёлларнинг белида бир неча граната ёки бомбача боғланган, Россиянинг белида эскириб қолган бўлса ҳам дунёни йўқ қилоладиган атом ва ядровий бомбалар бор. Демак, Россияни куч билан енгиб бўлмайди.”

Ҳозир АҚШдаги мухолифат Барак Обамани Россияга нисбатан юмшоқликда, Путинга нисбатан кучсизликда айбламоқда. Аслида, ундай эмас. Кўринишидан Барак Обама Абдураҳим Пўлат айтган аргументларни тўғри тушунмоқда, холос.

Россия, худди СССР каби, иқтисодининг чўкиши натижасида парчаланиб битади. Бу жараённи тезлатишда Россияга ёрдамчи бўлиш керак. Обама шундай қилмоқда. Аммо, вақти-вақти билан тиш кўрсатиб туришдан ҳам фойда бор.

Абдураҳим Пўлатнинг “Кенигсберг-Курил муаммолари ва Россия- Гуржистон уруши” номли мақоласи “Ҳаракат” журналида (2008 йил, № 4(73)) эълон қилинган. Унинг матни билан ушубу сайтнинг «“Ҳаракат” журналининг архиви» бўлимида танишиш мумкин.
« Олдинги хабар Хабарлар рўйхати Кейинги хабар »