21 April 2014
10:17 - Афғонистонда президент сайловларидаги бюллетенларнинг ярми саналди, Абдулла Абдуллоҳ биринчи ўринда мустаҳкаманмоқда
5 апрелда ўтказилган сайловларда иштирок этаган 13 номзод ичида Абдулло Абдуллоҳ (расмда) ва Ашраф Ғани фаворит эканлигини жаҳон агентликларига асосланиб биз ҳам хабар қилган эдик. 14 апрелда бюллетенларнинг 10 фоизи саналганда онаси тожик бўлган Абдулла Абдуллоҳ 41,9% овоз билан биринчи ўринда, Афғонистондаги ўзбеклар лидери Абдурашид Дўстим тарафидан қўллаб-қувватланган Ашраф Ғани эса 37,6% овоз билан иккинчи ўринда эканлиги маълум бўлганди.

Кеча Reuters Агентлиги бюлетенларнинг сал кам 50 фоизи саналгандаги натижаларни эълон қилди. Абдулла Абдуллоҳ 44,4% овоз билан биринчи ўринда мустаҳкамланибди, Ашраф Ғанига берилган овозлар 33,2 фоизга тушибди.

Биринчи турдаёқ ғалаба қозониш учун 50% дан кўп овоз олиш керак. Абдулла Абдуллоҳ Reuters мухбирига биринчи турдаёқ ғалаба қозонишига ишонишини билдирибди. Агар ҳеч ким 50 фоиздан кўп овоз ололмаса, иккинчи тур май ойининг охирида бўлиши кутилмоқда.

Эслатиб ўтиш керакки, мутахассислиги офтольмолог бўлган Абдулла Абдуллоҳ Афғонистонга киритилган СССР қўшинларига қарши курашган, Ҳамид Карзай президент бўлган йиллари ташқи ишлар вазири ҳам бўлган. У 2009 йилдаги президент сайловларида ҳам иштирок этиб, Ҳамид Карзай билан иккинчи турга чиққан, аммо иккинчи турда қатнашишдан воз кечган эди.
« Олдинги хабар Хабарлар рўйхати Кейинги хабар »