10 April 2014
22:11 - Украинанинг жанубида вазият юмшамади – Донецк ва Луганскда аҳвол жиддийлашмоқда
Аввалги хабарларимизда Харьков, Донецк ва Луганск вилоятларида аҳвол жиддий эканлигини, Харьков ва Донецкда руслар вилоят ҳокимликлари, Луганскда эса Давлат Хавфсизлик Хизмати вилоят бўлимининг биноларини босиб олишганини билдиргандик. Аввалги куни ижобий тенденциялар пайдо бўлганини ёздик, Харьков ҳокимлигидан сепаратистлар чиқарилди, қолган икки вилоятда сепаратистлар ва ҳукумат вакиллари воқеаларни тинч йўллар билан ҳал қилишга келишгандек бўлишди. Донецкда икки тарафнинг ўртасида воситачи сифатида Украинанинг энг бой одами Ринат Аҳметов тургани маълум бўлди.

Аммо, кейинчалик вазият юмшамади. Донецк ва Луганскда руслар ўз талабларидан қайтмасликларини билдирмоқдалар. Уларнинг талаби - ўз вилоятларини мустақил республикаларга айлантириш, кейин Россияга қўшилиш. Яъни, Москва бу икки вилоятда Қримдаги сценарий билан иш олиб бораётгани кўриниб турибди.

Воқеалар қандай йўналишда кетишини тахмин қилиш қийин. Ғарб ҳамма нарсада Москвани айблаб, Украина чегараларига яқин ерларда тўпланаётган Россия қўшинларини орқага олишни талаб қилмоқда. Европа Кенгашининг Парламент Ассамблеяси Россияни йил охиригача овоз бериш ҳуқуқидан маҳрум қилди.

Украина ҳукумат ўзининг иқтисодий муаммолари гирдобида қолган, ўз армиясини ва хавфсизлик хизматларини қайтадан шакллаштириш кераки. Бунинг устига, сиёсий нуқтаи назардан турли рангда бўлган 13 нафар номзоднинг иштирокида бўладиган президент сайловлари яқинлашмоқда. Москва эса, Украинанинг кучсиз эканлигидан келиб чиқиб, ҳали-бери чекинадиганга ўхшамайди.

Воқеаларнинг ривожланишини кузатиб боришни давом эттирамиз.

Расмда - руслар тарафидан барикадалар билан ўраб олинган Донецк ҳокимлиги.
« Олдинги хабар Хабарлар рўйхати Кейинги хабар »