08 March 2014
19:20 - Ўзбек жамиятининг аҳволи: Зоминда “Минг бир кеча” эртаги бир кунлик ҳақиқат бўлди
Жиззах вилоятида донғи кетган Тўрабой Ярлақабов 2014 йил 6 март куни шахсий хайдовчисининг туғилган куни муносабаати билан Зомин туманида катта улоқ берди. Улоққа камида 500 от ва 1000 га яқин чавондоз келди.Кўпкарига 10 та тана, юқори маррага 5 000 000 сўм пул, 500 000 сўмлик 20 та гилам ва бошқа қимматбаҳо буюмлар қўйилди. Эслатиб ўтамиз, ўтган йили берган улоғида Бойтўра полвон Сардоба тумани Жомъе масжиди имом хатиби Абдурахмонхожига бир дона шампань виноси рангидаги “Ласетти” автомашинаси хадя этган эди.

Улоққа борганларнинг айтишича, дастурхондаги нозу-неъматлар худди араб халқ эртагидаги “Минг бир кеча” афсонасини эслатади. Фарғона водийсидан келтирилган садаф узумлар, Эрон ва Хитойдан келтирилган олмалару ва тропик мевалар, лаганалардаги қази-қарталар, тандир кабобу, яхналар оддий халқнинг бир умрлик орзуси эди. Нима бўлганида хам қўшни давлатлардан келган чавондозлар зоминлик бойнинг мархамати ва ҳотамтойлигига қойил қолишди.

Баландчақирлик чавандоз Анвар полвоннинг айтишича, бундақанги тўй-томоша қилиш учун Жиззах вилояти саноат ишлаб чиқариш корхоналарининг бир ойлик даромади хам етмас экан. Ўша ерда мол боқиб юрган чўпон эса, кўпкари ўйинининг охирида бир чавандоз отдан йиқилиб нобуд бўлганини айтди.

Ҳа, афсонани ҳақиқатга айлантириш учун оддий халқнинг нонига кўз олайтирмай эришиб бўлмайди. Баландчақирлик кекса ногирон чавондознинг гапида жон бор.

Мунтазир
« Олдинги хабар Хабарлар рўйхати Кейинги хабар »