Ўтган куни ва кеча Олий Радада қабул қилинган қарорлар Украинадаги вазиятни кескин ўзгартирди. Биринчидан, Олий Раданинг мажлиси бу ерда кўпчилик овозга эга бўлган ҳокимиятдаги Регионлар Партиясининг қаршилигига қарамасдан ўтказилди. Чунки, мажлисга шу кунларда бу партияни тарк этиб, алоҳида фракция тузган депутатлар ва партиядан чиқмаса ҳам, ўз раҳбариятининг гапига қулоқ солмай қўйган яна бир гуруҳ депутат ҳам келди ва уларнинг кўпчилиги мухолифатга ён босувчи қарорлар учун овоз берди.

Эслатиб ўтамиз, Олий Рада намойишчиларга қарши антитеррористик ҳаракат бошлашни тақиқловчи, ички ишлар вазирлигининг қуролли кучларини Киевдан олиб чиқиб кетишга буйруқ берувчи, собиқ Бош вазир, зарғалдоқ инқилобининг лидерларидан бири Юлию Тимошенконинг қамоқдан озод қилинишига йўл очувчи, намойишчиларга қарши қаттиқ-қўллик қилаётган ички ишлар вазирини ишдан бўштувчи ва шу каби мухолифатга ён босувчи қарорлар қабул қилди.

Кеча тушдан кейин Президент Янукович мухолифат лидерлари билан учрашиб, Украинанинг 2004 йилда қабул қилинган - президент, ҳукумат ва парламентининг ваколатларини мувозанатини таъминловчи – Конституциясини сентябрь ойигача кучга киритиш, муддатидан аввал президент сайловлари ўтказиш, 10 кун ичида миллий бирлик ҳукумати тузишга келишди.

Кечга яқин эса, Олий Радага Президент Януковичга импичмент эълон қилиш ҳақидаги қарор лойиҳси киритилгани маълум бўлди.

Ана шундан кейин, турли ахборот воситалари ўзларининг қандайдир манбаларига асосланиб, бугун кечаси Президент Янукович энг яқин одамлари билан Харьковга учиб кетгани, ўша ерда Юлия Тимошенко билан учрашиши, кейин Россияга қочиши, унинг бир қатор маслаҳатчилари истеъфога кетгани, парламент спикери ва бир қатор юқори даражали мулозимларнинг оилалари Украинани тарк этгани, ишдан бўшатилган ички ишлар вазири Белорусига қочгани ҳақида ва шунга ўхшаш хабарлар тарқатдилар.

Олий Рада депутати, Мустақиллик Майдонининг коменданти ва ўз-ўзини ҳимоя қилиш кучларининг раҳбари Андрей Парубий намойишчиларга нафақат бу Майдоннинг ўзи, балки бутун Киев Майдоннинг назорати остига ўтганини эълон қилди, энди Януковични дарҳол истеъфога кетиши кун тартибида эканлигини билдирди. Бу гаплар қанчалик тўғри эканлиги ҳам ҳали маълум эмас.

Бундай шароитда, сиёсий доираларда ким янги бош вазир, ким президент бўлиши муҳокама қилинишга бошланганга ўхшайди.

Мана халқ депутати Давид Жваниянинг фикри: Юлия Тимошенко озод этилиши керак, аммо у катта сиёсатга қайтмаслиги, у ўзига қараши ва ёшларга йўл бериши керак.

Айни замонда, халқ депутати, 2012 йилнинг март ойидан бери ҳокимиятдаги Регионлар Партияси раисининг, яъни Януковичнинг ўринбосари бўлиб ишлаб келаётган, аммо яқинда бу партиядан чиқиб, Олий Радада ўз гуруҳини ҳам тузиб олган миллиардер Сергеей Тигиипконинг исми ҳам лидерликка даъво қилаётганлар ичида айтилмоқда.

Табиий, 2 ойдан бери давом этаётган воқеалар давомида исмлари янада машҳур бўлиб кетган мухолифат лидерлари ҳам президентликка ёки бош вазирликка даъво қилишларини кутиш керак. Улар расмда - Юлия Тимошенконинг блоки “Батькивщина”, “Свобода” Бирлашмаси ва “Удар” Партияси – лидерлари Арсений Яценюк, Олег Тягнибок ва Виталий Кличко.

Аслида, дейди мухбиримиз, Юлия Тимошенко масаласига жуда эҳтиётлик билан ёндошиш лозим. У Виктор Юшченко билан бирга 2004 йилдаги зарғалдоқ инқилобининг лидерларидан бири эди. Юшченко президент бўлгач, у икки марта Юлия Тимошенкони Бош вазир этиб тайинлади. Аммо, икки сафар ҳам Юлия Тимошенко сиёсий саҳнада биричи ролни ўйнаш ва тезроқ президентлик курсисига ўтириш иштиёқидаги сиёсатчи эканлигини кўрсатди. Бу масалада ёрдам истаб, ўзининг ашаддий душмани, ўша пайтдаги Россия Бош вазири Владимир Путиннинг пинжига тиқила бошлади, аммо Путин уни ёш боладек алдаб ишлатди ва отиб юборди.

Шундай босқичлардан ўтган Юлия Тимошенкога ишонилса, мухолифат яна тезда кризисга учраши мумкин.

Аммо, лидер танлаш – украинларнинг ички иши. Ўзбеклар Украинада бўлган ва бўлаётган воқеалардан дарс олишлари лозим, холос.