Тошкентда Президент Ислом Каримнинг шахсий ташаббуси билан қурилиб, айнан шу туфайли мадҳ этилаётган футбол майдонини Миллий терма жамоамиз бош мураббийи Миржалол Қосимов танқид қилишга жазм этди. Унинг фикрича, Ливан терма жамоаси билан ўтган учрашув оғир кечган ва бунга стадионнинг майсаси айбдор.

“Биз мана шундай катта, муҳташам, жаҳон талабларига жавоб берадиган стадионга эга ўлганимиздан албатта, жуда ҳурсанмиз. Аммо, майдон чимининг ҳолати менда жуда салбий таассурот қолдирди. Бундай майдонда халқаро ўйинлар у ёқда турсин, маҳаллий савиядаги ўйинларни ўтказиш ҳам қийинчилик туғдиради. Бундай майсали майдонда ўйнаш азобнинг ўзгинаси” деган Қосимов матбуот анжуманида.

Ажабки, Қосимовнинг бу борадаги интервьюсини барча маҳаллий нашрлар чоп қилмоқда. Uz доменидаги интернет нашрларининг етакчи мавзуига айланган “чим воқеаси”нинг қандайдир акс-садосини яқин орада кўрсак ажабмас.