“Толибон” ҳукумати ўз мамлакати ҳисобланадиган Афғонистонда ҳокимиятни қўлга киритганидан сўнг биринчи марта мамлакатдаги раҳбарлик лавозимларига аёллар тайинланганини эълон қилгани маълум бўлди. Бундай баёнот кеча кечқурун Twitter'да, ҳаракат томонидан тузилган Афғонистон муваққат ҳукуматида Ахборот ва Маданият Вазири ўринбосари этиб тайинланган Забиҳуллоҳ Мужоҳиднинг саҳифасида эълон қилинди.

Баёнотда шундай дейилган экан: “Муваққат Вазирлар Маҳкамаси раҳбарининг фармойиши билан доктор Малалай Раҳим бутун мамлакатдаги ягона акушерлик ва гинекология муассасаси бўлган “Малалай” ихтисослаштирилган туғуруқхонасига (Кобул шаҳридаги) директор этиб тайинланди. Вазирлик таклифи ва муваққат ҳукуматдаги Бош Вазирнинг розилиги билан доктор Ариан Шаҳрор гинекология клиникаси директори этиб тайинланди”.

Ушбу тайинловлар олдидан ҳаракат аъзоларининг қатор давлатлар ва халқаро ташкилотлар вакиллари билан кўплаб учрашувлари бўлиб ўтгани, уларда, хусусан, аёлларнинг мамлакат ижтимоий-сиёсий ҳаётидаги иштироки масаласи кўтарилган экан.

БМТ маълумотларига кўра, халқаро ҳамжамиятнинг фаол қўллаб-қувватлаши туфайли сўнгги 20 йил ичида Афғонистонда туғуруқ вақтида ўлим кўрсаткичи 2000 йилдаги ҳар 100 минг ҳолатдаги 1 минг 450 та ўлимдан 2019 йилдаги бор-йўғи 638 ўлим ҳолатигача камайибди. Шунга қарамай, бу дунёдаги энг юқори кўрсаткичлардан бири эканлигича қолмоқда экан.