Тангрим, кечир, Тангрим, кечир, Тангрим, кечир...

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

Барча қарши чиқишга қўрққан -
Ёвузликка чиқмаган қарши -
Эр эмасдир - қолган оёқдан ,
Тирикликдан - номусдан ташқи.

Барча бирдай айтишдан қўрққан
Ҳақиқатни айтмаган киши -
Эр эмасдир - қолган юракдан,
Гўрга топшир, мозорга таши.

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

Отилдими Борис Немцов,
Ким ғамдан дил тилдиради?!
Эснаб - эснаб, мудроқ дунё,
Чуқур ташвиш билдиради.

Қирилдими уйғурларим,
Ким ҳам отин елдиради?!
Дунё - емиш шотирлари,
Чуқур ташвиш билдиради.

Вирус - кимларнинг қуроли,
Қанча жонни ўлдиради?!
Жаҳон - жасорат заволи:
Чуқур ташвиш билдиради.

Тутаётир еру - само,
Ким ўч ишин жилдиради?!
Ёниб битаётган дунё,
Чуқур ташвиш билдиради.

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

Ичингдаги ахлатга буюр, зўр бўлсанг, тўра,
Чиқиш вақтидан бурун чиқсин, тозалан, яйра.
Гўнггаки сўзинг ўтмас - нечун келасан кўкдан,
Шошил, улгур, Тангрига ялвар - кечирим сўра!

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

Барча вайсар кечаю - кундуз,
Шоҳу гадо - валдирар улус.
Мен излайман вақт каби бетин,
Эшитишга лойиқ бирон сўз.

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

Тозалаб бўлмайди, ғаним, қонингни,
Ичинг кири олар иркит жонингни.
Мени камситасан - гарчи бетиним
Отим айлантирар тегирмонингни...

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

Елсиз ҳам исининг сели келади,
Ёғду бўлиб - юзин оли келади.
Бошдан - оёғи бол - бўйига юққан,
Сулув бўйи билан боли келади.

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

Армонсиз дин - фақат севги.
Гумонсиз дин - фақат севги.
Тангри - севги - чинлар чини -
Ёлғонсиз дин - фақат севги.

!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!!

Қачон тоза кўнгил бўлдим?!
Қошингда номусдан ўлдим.
Яшамай оқ юрак билан
Гуноҳ килдим, гуноҳ килдим.

Ичим кири чексизликдан
Ўзгандир - ўзган қанчалик -
Тозалигинг чексизликдан
Ўзгандир, Тангрим, шунчалик!

Қат- қат кирдан ечинтиргин,
Ўзинг - ечгир, Ўзинг - ечгир!
Тангрим, кечир қилмишимни,
Яна қилсам - яна кечир!

Қачон эсли - ҳушли бўлдим?!
Қошингда номудан ўлдим.
Нодонлик ҳам тентакликдир,
Қилмиш қилдим, қилмиш қилдим.

Нодонлигим чексизликдан
Ўзгандир - ўзган қанчалик -
Донолигинг чексизликдан
Ўзгандир, Тангрим, шунчалик.

Осийлигим чексизликдан
Ўзгандир - ўзган қанчалик -
Кечириминг чексизликдан
Ўзгандир, Тангрим, шунчалик!

Айбларимдан ечиртиргин,
Ўзинг ечгир, Ўзинг - ечгир.
Тангрим, кечир қилмишимни,
Яна қилсам - яна кечир!

(2021 йил, 19 апрель кунги шеърлардан)