10 March 2017
11:48 - Жанубий Кореянинг Конституцион Суди парламентнинг Президент Пак Кин Хен ҳақидаги импичмент қарорини тасдиқлади
Расмий номи Корея Республикаси бўлган, аммо оммавий ахборот воситалари тарафидан кўпинча Жанубий Корея деб аталадиган давлатнинг президентлик курсисида 2013 йилдан бери ўтирган 65 ёшли Пак Кин Хен хоним 2016 октябрь ойидан бери катта жанжал ичида эди. У президент бўлгандан бери яқин дўстларининг таъсир доирасида қолгани, давлат миқёсидаги қарорларни айнан уларнинг таъсири остида ва уларнинг фойдасига қабул қилгани, яъни тўғридан-тўғри коррупция ботқоғига ботгани маълум бўлгач, параламент у ҳақида импичмент қарори чиқариб, унинг ппезидентлик ваколатларини тўхтатиб қўйган эди. Ўшандан бери президентлик вазифаси Конституцияга кўра, Бош вазир Хван Гёанга ўтган эди.

Бугун бу давлатнинг 8 кишилик Конституцион Суди бир овоздан парламентининг импичмент қарорини тасдиқлади, шу билан Пак Кин Хеннинг президентлиги расман тугади. Энди у қамалиши ҳам мумкин.

Бу мамлакатда президент атрофида бўлган жанжал қанчалик хунук бўлмасин, дейди мухбиримиз, Корея Республикаси ўзининг ҳақиқий демократик давлат эканлигини намойиш қилди. Дунёнинг бошқа давлатлари Жанубий Кореяда бўлган бу воқеадан сабоқ чиқаришлари, ҳар қандай даражадаги коррупцияга қарши демократик қонунлар доирасида курашишга ўрганишлари керак.
« Олдинги хабар Хабарлар рўйхати Кейинги хабар »