АҚШ Сенатида озчилик бўлган демократларнинг лидери Гэри Рид Марказий Истиҳборат Ташкилоти (МИТ, инглизча – CIA, русча – ЦРУ) директори Жеймс Комига мактуб йўллаб, Россиядаги ҳокимият АҚШда яқинда бўладиган президентлик сайлови натижаларини сохталаштириш ниятида эканлигини айтибди. Бу ҳақда Нью-Йорк Таймс газетаси хабар қилган. Лекин, дейилади хабарда, Сенаторнинг хатида руслар қандай қилиб сайлов натижаларини сохталаштириши мумкинлиги айтилмайди.

Гэри Рид ўз хатида Республикачилар Партиясининг президентликка номзоди Доналд Трамп ноябрда бўладиган сайловларни оммавий сохталаштирилиш хавфи борлиги ҳақида гапираётганини ҳам урғулаган эмиш.

Сенатор Гэри Рид фаол шаклда ўз партиясининг номзоди Ҳиллари Клинтонни қўллаб-қувватлаётгани, ўзи сенаторликка сайланган Невада штатидаги сайлов олди кампаниясида Ҳиллари Клитнон билан бирга юрганидан келиб чиқсак, унинг иддаоси Ҳиллари Клинтонга ҳам оид эканлигини тушуниш мумкин, дейди мухбиримиз. Америкадек давлатда президентликка номзодлар сайлов натижаларининг сохталаштирилиши ҳақида гапиришлари фақат кулгили эмас, АҚШ демократияси оёғига болта урувчи масхарабозликдир.

Россия-Ғарб, Туркия-Ғарб, Туркия-Россия муносабатлари доирасида бўлаётган воқеалар, охирги 2 кунда Ўзбекистон Президенти Ислом Каримнинг касаллиги атрофида тарқатилаётган хабарлар ва жуда кўп бошқа воқеалар кўрсатмоқдаки, жаҳоннинг сиёсий тизимида, ножиддий ахборот воситаларининг иштирокида, айнан сиёсий масхарабозлик илдиз отмоқда. Бу нарса жаҳоннинг барқарорлигига хавф солиши муқаррар.

Расмда – Ҳиллари Клинтон ва Гэри Рид Невада штатида сайлов олди кампанияси доирасида ўтказилаётган учрашувлардан бирида.