17 September 2015
02:23 - Тожикистонда исёнчи генерал Ҳожи Ҳалим Назарзода йўқ қилингани расман эълон қилинди
Тожикистонда тожикларнинг ўзи ҳам тушунмаётган воқелар бўлаётгани, тожик милицияси тарафидан уриб ўлдирилган ёш йигитнинг қариндошлари туман милициясига ҳужум қилиб, қурол-аслаҳа олиб қочганлари, айни замонда, Мудофаа вазирлигининг марказий идорасига қуролли гуруҳлар ҳужум қилгани, ҳар бир ҳужум натижасида 4 тадан милиционер ҳалок бўлган, иккинчи ҳужумни Мудофаа вазирининг ўринбосари, Ислом Уйғониш Партиясининг аъзоси Ҳалим Назарзода уюштиргани, кейин у бир неча одами билан тоғларга қочиб кетгани ҳақида 6 сентябрь куни хабар қилган эдик.

Кейинги кунларда бир неча марта Ҳалим Назарзода расмий кучлар тарафидан ўлдирилгани хабар қилинди, кейин бу хабар хато бўлгани айтилди.

Кеча Тожикистон ички ишлар вазирлиги ва Миллий Хавфсизлик Комитети Ҳожи Ҳалим Назарзоданинг тўдаси тоғларда қуршовга олиниб, сўнгра бутунлай йўқ қилинганини хабар қилдилар. Ҳожи Ҳалим йўқ қилинган 10 киши ичида эканлиги алоҳида урғуланади.

Бу махсус операцияни ўтказиш вақтида Миллий Хавфсизлик Комитетининг “Альфа” номли антитеррористик гуруҳи командири полковник Рустам Амакиев ва яна уч киши ҳалок бўлган. Сўнгги 10 кун ичида ҳаммаси бўлиб 30 исёнчи ўлдирилган, 100 дан кўпроғи қўлга олинган.
« Олдинги хабар Хабарлар рўйхати Кейинги хабар »