19 September 2019
01:28 - АҚШда Марказий Банк ролини ўйнайдиган Федерал Резерв кечаги йиғилишида қарз учун олинадиган фойда фоизини 0,25% га туширди, аммо барибир Dow Jones озгина юксалди
Кеча эрталабки хабаримизда АҚШ иқтисодиётининг кўрсатгичи бўлган Нью Йорк Фондлар Биржасининг Dow Jones индекси ўтган куни бироз пастга тушганини, бунинг сабаби Эрон ҳарбийлари Саудия Арабистонидаги катта нефтни қайта ишлаш заводларидан биттасини бомбалашгани ва жаҳон бозорида нефтнинг нархи тушиб кетиши билан изоҳланаётганини айтгандик.

Фақат айтиш билан чекланмасдан, нефтни қайта ишлаш заводларидан биттасининг бомбаланиши нефтнинг нархи тушиб кетишига ва турли ваҳималар туфайли АҚШ иқтисодиётининг асосий кўрсатгичи бўлган Нью Йорк Фондлар Биржасининг Dow Jones индекси бироз пастга тушишига сабаб бўлолмаслиги кераклигини айтиб, аслида, ваҳималар ортиқча эканлиги тезда маълум бўлгани, энди нефть нархи жойига тушиши билан бир қаторда Dow Jones индекси юксалишини ҳам башорат қилган эдик.

Минг афсуски, бизнинг башоратимиз амалга ошмагандек кўринди. Чунки, кеча маҳаллий вақт билан тушдан кейин ўтказилган Федерал Резерв йиғилишида бошқаларга берилган қарз учун олинадиган фойда фоизи 0,25% га камайтирилди. Маълумки, капиталистик системада фоиз ставкасининг камайтирилиши иқтисодиёт ёмонлашаётган пайтда бўладиган воқеа.

Федерал Резерв шундай қарор чиқариши мумкинлиги кутилаётгани сабабли, кеча Нью Йорк Фондлар Биржаси жуда эҳтиётлик билан ишлабди ва пешингача Dow Jones индекси ҳатто 0,25 фоизга тушибди. Аммо, Федерал Резервнинг қарори маълум бўлгач, Dow Jones индексининг тушиши янада тезлашди ва 26 минг 900 тушди.

Бироқ, иш куни тамом бўлгунча Dow Jones ўзини эплаб олди ва Нью Йорк Фондлар Биржаси бекилганда 27 минг 147 бўлганди. Яъни, ўткан кунги 27 минг 111 дан ҳам бироз ошиб кетди. Демак, осмон узилиб тушмаса, бир неча кун ичида янги тарихий рекорд ўрнатади.
« Олдинги хабар Хабарлар рўйхати Кейинги хабар »