10 January 2018
22:19 - Прописка бекор қилинмайди, унинг аҳамияти йўққа чиқарилади
Шу пайтга қадар асосан пойтахт ва пойтахт вилоятига прописка қилиш, шу орқали ички миграцияни жиловлаш сиёсати мавжуд эди. Шу боисдан бир неча юз минглаб фуқаролар пропискасизлиги учун ишга кира олишмаган, уларнинг аксарияти жаримга тортилиб, таъқиб қилиб келинган. Президент Шавкат Мирзиёнинг янги йил арафасидаги нутқидан сўнг мамлакатда прописка, паспорт олиш, таълим, меҳнат қилиш ва бошқа конституцион ҳуқуқларни амалга ошириш билан боғлиқ чекловларни бекор қилиш режалаштирилмоқда.

Хусусан, 2018 йилда мавсумий ишларга жалб қилинганлар учун уй-жой ижараси, уй-жойдан текин фойдаланиш битимини тузиш талабини бекор қилиниши кутилмоқда. Шунингдек, йилнинг 20 мартига қадар мавсумий ишларга жалб қилинганларни вақтинчалик рўйхатга олиш тизимини соддалаштириш тадбири амалга оширилиши белгиланган.

Фуқароларнинг ўз турар жойларида паспортсиз, пропискасиз ёхуд турган жойи бўйича ҳисобда турмаган шахслар яшаб туришига йўл қўйганлик учун жавобгарликни енгиллаштириш шартлари қонун билан кўриб чиқилмоқда. 2018 йилда фуқаролик паспортини олиш, таълим олиш, меҳнат қилиш ва бошқа конституциявий ҳуқуқларни амалга оширишда прописка билан боғлиқ чекловларни бартараф қилиш назарда тутилади.
« Олдинги хабар Хабарлар рўйхати Кейинги хабар »