Тасодифан қўриб қолдик, Фейсбукда саҳифаси ҳам бор бўлган Нозимжон Ҳошимжон исмли бир киши укасининг Никоҳ ҳамда жиянининг Ҳатна тўйлари муносабати билан берилаётган ошга таклифномани Фейсбук орқали ҳам тарқатибди.

Биз бу таклифноманинг расми билан биргаликда, унга Абдураҳим Пўлат берган таҳлилни ҳам эълон қилмоқдамиз.

* * * * *

Ҳурматли Нозимжон Ҳошимжон! Ҳаммани "Никоҳ" ва "Ҳатна" туфайли берилаётган ошга таклиф қилганингизни тасодифан кўриб қолдик. Авваламбор, тўй билан табриклаймиз. Аммо, бу эълонингизни кўриш билан 1991 йил июнь ойида биринчи марта Туркияга борганим эсимга тушди.

Дўстим ва сафдошим билан борган эдик. Жуда кўп расмий учрашувлардан ташқари, у ерда яшайдиган бир қатор ўзбекларнинг уйида меҳмон бўлдик. Қаерга борсак, тайёрлаб қўйилган дастурхон атрофига ўтиришимиз билан биз иккаламиз, кафтларимизни очиб қўлимизни кўтаришга тайёрланардик, чунки, бизда ҳамма нарса энг камида "ОМИН" деб қўйиш билан бошланадику. Аммо, у ерда ҳеч бундай қилишмади. Ўшанда биринчи марта кўрдикки, ҳар қадамда, керакми-керакмасми, фарқи йўқ ,"ОМИН" деб қўлни юзга тортавериш ва ҳар бир нарсага ош беравериш одати биз ўзбеклардагина бор.

Мирзо Улуғбекдек улуғ олимимзни ўлдириб, у яратган дунёнинг 2-чи расадхонасини бузиб ташлаб, унинг борлигини ҳамммага унуттирганимизнинг, жаҳон цвилизиациянинг сўнги 5-6 асрдаги ривожланишига ҲЕЧ ҚАНДАЙ ҳисса қўшолмаганимизнинг, ўрислар бизни осонликча босиб олгунларича шам чироқ ва Қўқон аравадан нарига ўтолмаганимизнинг, Улуғбек расадхонасининг қолдиқларини рус архитектори Вяткин сал кам 20 йил қидириб бизга топиб бермаса, ҳалигача бундай расадхона борлигини ҳам билмасдан юраверишимиз мумкинлигининг сабаби - қиладиган ишимиз "ОМИН!" деявериш ва ош беравериш бўлиб қолгани эмасми? АЙНАН ШУНДАЙ.

Ош бераётганингизни ҳатто Интернетда эълон қилибсиз, демак, ўн минглаб одам келишига тайёргарлик кўрмоқдасиз. Майли, уни яхшилаб ўтказиб олинглар, аммо илтимос, келажакда бундай ибтидоийликдан узоқроқ турайлик. Мирзо Улуғбек ва ўз юртимиздан ўзимиз ҳайдаб чиқарган Заҳриддин Бобур каби улуғларнинг авлодлари эканлигимизни дунёга кўрсатайлик. Ҳозирча эса, руслар ва қозоқларга мардикорчилик қиладиган пода аҳволидамиз. Ислом дунёси ҳозир жаҳоннинг энг қолоқ ва қашшоқ қисми, ақл-идорок бўйича ҳам айнан шундай, эканлигини биласизми? Бизни бу аҳволдан Оллоҳ олиб чиқмайди, чунки, У бизга ақл берган, ақлни ишлатиб, аҳволимизни тузатиш ўз ишимиз. Унутманг, БИЗДАН ҲАРАКАТ - ОЛЛОҲДАН БАРАКАТ.

Ҳаракат қилишни истайдиганлар harakat.net ва унинг Фейсбукдаги саҳифасини ўқисинлар - facebook.com/harakat.net