26 July 2017
07:06 - АҚШ Конгрессининг қуйи палатаси Россия, Эрон ва Шимолий Кореяга қарши янги санкциялар ҳақидаги қонун лойиҳасини маъқуллади
Reuters Агентлиги ҳозиргина “Вакиллар Уйи Трампга тош отиб, Россияга қарши янги санкцияларни маъқуллади” номли хабар тарқатди. Унда айтилишича, АҚШ Конгрессининг қуйи палатаси – Вакиллар Уйи мутлақо кўпчилик овоз билан Россияга қарши янги санкциялар киритиш ҳақидаги қонунни маъқуллаган. Қонун лойиҳасида Президент Трамп Конгресснинг рухсатисиз бу санкцияларни юмшатишга ҳаққи йўқлиги алоҳида таъкидланган.

Табиий, янги санкциялар Россиянинг Украинага нисбатан давом этаётган агрессив сиёсатига қарши киритилгани, аммо конгрессменлар овоз беришда Россия 2016 йилда АҚШда ўтказилган президентлик сайловларига қандай таъсир кўрсатгани ўрганилаётганини ҳам ҳисобга олганлари хабарда айтилади.

Хабарда асосий урғу Россияга қарши киритилган санкцияларга берилган, аммо санкциялар Эрон ва Шимолий Кореяга ҳам қарши киритилгани айтилган.

Эслатиб ўтамиз, бу қонун лойиҳаси энди Сенатда ҳам маъқулланиши, кейин Президент Трамп тарафидан имзоланиши керак. Президент уни имзомаслик ҳаққига эга. Аммо, қонун икккинчи марта Вакиллар Уйи ва Сенат тарафидан маъқулланса, Трамп уни имзолашга мажбур бўлади. Ҳозир Конгрессда оби-ҳаво шундайки, бу қонун охир-оқибатда Трамп тарафидан имзоланади.

Нима ҳам дердик, бизни Эрон ва Шимолий Корея унчалик қизиқтирмаса ҳам, бечора Путин деймиз.
« Олдинги хабар Хабарлар рўйхати Кейинги хабар »