Ўзини Халифалик деб эълон қилган ИШИДнинг Ироқдаги пойтахти деса бўладиган Мосул шаҳрига 9 июлда Ироқ Бош вазири Ҳайдар ал-Абади келди (расмда) ва шаҳар террористлардан бутунлай озод қилинганини айтди. Авваллари ҳам шаҳар озод қилингани ҳақида кўп марта расмий баёнотлар берилса ҳам, шаҳарнинг маълум қисмлари ҳали ҳам ИШИДнинг қўлида эканлиги айтиларди. Аммо, баъзи хабарларга кўра, ҳозир ҳам шаҳарнинг маркзига яқин қисмида 1 квадрат километрлик жой террористлар қўлида эканлиги айтилмоқда.

Нима бўлганда ҳам, дунё лидерлари Мосулнинг тўла озод қилинганини тан олганга ўхшайдилар. Франция Президенти Макрон 9 июлдаёқ бу шаҳарнинг озод қилинишида иштирок этганларни ўз Твиттерида ғалаба билан табриклаган эди. 10 июлда АҚШ Президенти Трамп Ҳайдар ал-Абадини Мосул озод қилиниши билан табриклади. Ўшандан бери дунё лидерлари Ироқни буюк ғалаба билан табриклаб ётибдилар. Мосул Халифаликнинг асосий пойтахти бўлмаса ҳам, айнан шу шаҳардан Абу Бакр ал-Боғдодий Халифалик тузилгани, ўзи Халифа бўлганини эълон қилгани, қолаверса, Мосул Ироқнинг Боғдоддан кейинги иккинчи катта шаҳри эканлиги туфайли унга эътибор катта эди.

Халифа Абу Бакр ал-Боғдодий тирик ёки ўлик эканлиги ҳали ҳам номаълум. Бугун Reuters Агентлиги хабар қилишича, маркази Лондонда бўлган Инсон Ҳуқуқлари Сурия Обсерваторияси раҳбари Рами Абдураҳмон ИШИДнинг энг юқори даражали раҳбарларидан Абу Бакр ал-Боғдодийнинг ўлгани аниқ эканлиги ҳақида маълумот олганларини айтибди. Аммо, Ироқ ва Сурия расмийлари ҳамда Пентагон ҳали тўла ишонишга арзийдиган маълумотлар йўқлигини айтишибди.

Қаранг, бутун дунё бор-йўғи террористик гуруҳ деб айтаётган ИШИДни айнан бутун дунё биргалашиб 3 йилдан бери йўқ қилолмаяпти. Тўғри, Халифаликнинг асосий пойтахти Ракка ва Суриядаги бошқа шаҳар Хомс ҳам террористларнинг қўлидан кетиш арафасида. Аммо, ҳозир жиҳодчилар Дейр-эз-Зора шаҳрини пойтахт деб эълон қилишга тайёрланишаётгани ҳам хабарларда айтилмоқда. Бу шаҳар ҳали тўла ИШИД қўлида эмас, у ерда Суриянинг расмий қўшинларии бор, аммо ИШИД уни тўла қўлга олмоқчи.

Аввалги хабарларимизда ҳам айтилганидек, Сурия ва Ироқда катталиги билан Бельгияга тенг келадиган ҳудудлар ҳали ҳам ИШИДнинг қўлида. Шубҳа йўқки, улар ҳам тозаланади. Аммо, дунёнинг у ёки бу жойларида янги террористик гуруҳлар чиқаверади. Чунки, ислом терроризмининг илдизлари Қуръоннинг хато тафсиридан келиб чиққан Ислом динининг хато тушунчаларида, тўғрисини айтсак, Ислом динининг ўзидадир. Демак, Ислом динида фундаментал ислоҳотлар ўтказиб, бу хато тушунчлардан тозаланилмаса ва Ислом дини дунёвийлик/секуляризм принципини тан олмаса, ислом терроризми жаҳон бўйлаб давом этаверади.