11 July 2017
19:36 - АҚШнинг ахборот воситалари Трампнинг тирноғи остидан кир қидиришда яна ақлдан оздилар, нега “Ҳаракат” орқада қолиши керак?
Совет замонининг машҳур «Мистер Икс» фильмида ҳамманинг ҳам эсида қолавермайдиган бир эпизод бор. Кўнгилочар программалар кўрсатиш билан ҳам шуғулланадиган машҳур рестораннинг зодагон эгаси бўлган аёл циркга кетаётганини айтиб, шундай қўшимча қилади: “Циркдаги янги мўъжиза -Мистер Иксни кўрмоқчиман. Бутун шаҳар ақлдан озди. Мен ҳам орқада қолмоқчимасман”.

Қаранг, ақлдан озишда ҳаммадан орқада қолмаслик ҳам буюк иш экан. Мана, 2 кундан бери АҚШдек давлатда ҳамма ахборот воситалари яна ақлдан озмоқдалар, нега “Ҳаракат” орқада қолиши керак? Қолмаймиз.

Reuters агентлиги “Нью-Йорк Таймс” газетасига асосланиб хабар беришича, АҚШ Президенти Доналд Трампнинг биринчи хотинидан ўғли Доналд-2 (инглизлар уни Donald Jr. дейдилар, биз Доналд-2 демоқдамиз, уни расмда кўрмоқдасиз) ўтган йили отасининг сайлов олди кампанияси даврида, аниқроғи, 9 июнда поччаси Жаред Кушнер ва Трампнинг сайлов кампанияси раҳабари Пол Манафортнинг иштирокида ҳуқуқшуносликни ҳам бизснесга айлантириб катта пул қилаётган россиялик адвокат Наталья Весельницкая билан Нью-Йоркадаги осмонўпар Трамп-тауэрда учрашув ўтказган экан. Нимамиш, исми айтилмаган 3 манбанинг билдиришича, бу учрашувдан олдин Роб Голдстон (Rob Goldstone) исмли журналист ўзи танийдиган Доналд-2 га электрон хат йўллаб, россиялик адвокат Наталья Весельницкая билан кўришиш кераклигини, у адвокатда президентликка иккинчи номзод Ҳиллари Клинтон ўз сайлов кампанияси учун Россиядан пул олгани ҳақида маълумотлар борлигини, бу маълумотлар Ҳиллари Клинтонни обрўсизлантириш учун муҳимлигини ёзганмиш, шу сабабли учрашув бўлганмиш.

Қизиғи шундаки, “Нью-Йорк Таймс” газетаси бу ҳақдаги хабарини кеча, яъни 10 июлда тарқатди. Аммо, 9 июлда, яъни бир кун аввал, Доналд-2 кутилмаганда баёнот тарқатиб, бир йил аввал бўлган россиялик адвокат билан учрашувини очиқлаб бўлган ва россиялик адвокат билан учрашувда АҚШдаги сайлов ва Ҳиллар Клинтон тилга олинмагани, учрашувда россиялик етимларни АҚШда асраб олиш атрфидаги масалалр, Ғарбнинг Россияда адвокат Сергей Магнитскийнинг қамоқхонада сирли равишда ўлиб қолгани ёки ўлдирилганидан кейин АҚШда бу ўлимга доир Россия расмийларига қарши киритилган санкциялар гаплашилганини айтган, бундай эътиборга лойиқ бўлмаган воқеа ҳақида Доналд Трампга хабар берилмаганини ҳам урғулаган экан. Савол туғилади – шундай арзимаган масалаларни муҳокама қилиш учун АҚШдек давлатниннг президенти бўлиш учун кураш олиб бораётган Доналд Трампнинг 3 нафар яқин одами қандайдир россиялик адвокат билан учрашадими? Бу саволларга жавоб қидирсак, яна бир марта “масхарабозлик” ифодасини ишлатишга тўғри келади.

Энди Оқ Уй расмийлари “Нью-Йорк Таймс” газетаси ҳеч қанақа сирни эмас, Доналд-2 очиқлаб бўлган воқеани сенсация қилиб ёзаётгани устидан кулишмаётган бўлса ҳам, яхшигина кесатишмоқда. Аслида, тахмин қилиш мумкинки, Оқ Уй “Нью-Йорк Таймс” газетаси бундай материал тайёрлаётганини ўз манбалари орқали билиб қолган ва Доналд-2 бир йилдан бери сир тутиб келинаётган учрашувни очиқлаган. Хуллас, қаёққа қараманг, КАТТА масхарабозлик.

“Нью-Йорк Таймс” газетасининг хабари эътиборсиз қолмади. Ҳозир бутун дунё уни муҳокама қилмоқда. АҚШ Конгрессининг Россия ўтган йилги АҚШдаги президентлик сайловларига аралшганини текшириш учун тузилган комиссияси аъзолари Доналд-2 ни ўзлари сўроқ қилишлари кераклигини гапиришга бошладилар. Адвокат Наталья Весельницкая ҳам бугун ўша учрашув ҳақида гапиришга бошлади, у ерда АҚШдаги сайловларга оид ҳеч нарса тилга олинмагани, АҚШнинг Россияга қарши киритган санкициялари гаплашилганини айтди. Яна савол туғилади: “Эй, Анастасия, сен ким бўлибсанки, шундай муҳим СИЁСИЙ масалани гаплашиш учун Доналд Трампнинг 3 нафар яқин одами сен билан учрашсин?” Бу саволга ҳам жавоб қидирмаймиз, акс ҳолда ҳаммаёқ масхарабозликка айланаётганини гапиришга тўғри келиб қолади.

Доналд-2 бу воқеа атрофида катта тўпалон бўлишини яхши тушунгани туфайли, айнан шу масала бўйича ўзига ёрдамчи бўладиган адвокат ҳам ёллабди.

Дарвоқе, Россия ахборот воситалари, ҳатто биз ҳурмат қиладиган Gazeta.ru ҳам “Нью-Йорк Таймс” газетасида айтиб ўтилган бир нарсани ҳеч тилга олмайдилар. Бу нарса аслида жуда қизиқ ва муҳим. Наталья Весельницкаяни Доналд Трамнинг одамлари билан учраштиришни Роб Голдстондан Россиянинг энг кўзга кўринган бойларидан бири, Путинга яқинлиги ҳам айтиладиган, асли озорбайжон Араз Агаларов сўраган экан.

Мана энди Доналд Трампнинг тирноғи остидан кир қидираётган АҚШнинг оммавий ахборот воситалари ва сиёсий элитаси тироқ остидан катта кир топганга ўхшамоқда.

Аммо, Араз Агаларовнинг бизнессдаги ўнг қўли ўз ўғли – ярим бизнессмен, ярим эстрада хонандаси, яъни оддий масхарабоз Эмин Агаларов - “Мисс АҚШ” конкурсининг яқин йилларгача эгаси бўлган Доналд Трамп билан яқиндан таниш бўлгани, ўша конкурслар атрфида айланиб юрганини ҳам ҳисобга олсак, бўлаётган воқеалар навбатдаги масхарабозлик эканлигини тушунамиз.

Аммо, АҚШнинг энг катта оммий ахборот воситалари ва сиёсий элитаси ҳам шуларни тушунмасдан, ёки тушуниб, аммо ўзлари яхши кўрмайдиган Доналд Трампдан алам олиш нияти соясида ақлдан озаётганлари ва навбатдаги масхарабозликка кираётганлари устидан кулишдан бошқа йўлимиз йўқ.

Ёки, биз ҳам ақлдан озиш йўлига ўтайликми?
« Олдинги хабар Хабарлар рўйхати Кейинги хабар »