Версаль – Париж яқинидаги бир вақтлар Франция қиролларининг қароргоҳи жойлашган шаҳарчадир. Россия Императори Петр I бу ерга 300 йил аввал айнан шу кунларда келиб, икки мамлакат ўртасидаги алоқаларни яна бир поғонага кўтариб кетгани тарихий фактдир. Шу воқеага бағишланган кўргазмани кўриб кетиш баҳонасида Россиянинг ҳозирги Императори, ... эй, кечирасиз, Президенти Владимир Путин бу кўргазмага таклифни яқинда сайланган Франция Президенти Эмануэл Макрондан, қўполроқ қилиб айтсак, шахсан ўзи бир амаллаб суғириб олди.

Мана бугун икки президент Версалда учрашдилар ва биргаликда матбуот конференцияси ҳам ўтказдилар. Маълум бўлдики, 3 соатлик учрашув пайтида улар дунёнинг ҳамма муаммоларини, муҳим бўлган Сурия ва Украина билан боғлиқ муаммолардан ташқари, Шимолий Корея қуролланишни давом эттираётганидан келиб чиқаётган тўпалонларгача ҳамма нарсани муҳокама қилганлар.

Яъни, икки президент ҳамма муаммолар бўйича фикр алмашишган, уларнинг бундан бошқа мақсади бўлмаган ҳам.

Диққатга сазовор биттагина нарса бор. Бу - Эмануэл Макрон русларни Russia Today ва Sputnik агентликлари воситасида ёлғон тўла пропаганда руҳидаги хабарлар тарқатишда айблаганидир. Путин бунга қандай жавоб бергани ҳам хабарларда айтилмайди, аммо Россия Президентининг матбуот котиби Дмитрий Песков Версалнинг ўзидаёқ бу айбномалар тўғри эмаслигини билдирди.

Russia Today ва Sputnik агентликлари ҳақидаги Франция Президенти айтган гаплар “Ҳаракат”ни қизиқтирганининг яна сабаби бор, дейди мухбиримиз. Айнан бугун биз шу икки агентликнинг Ўзбекистонга тегишли хабарларда ҳам ёлғон пропагандага муккасидан кетгани ҳақида таҳлил бериш ниятида бўлган эдик. Франция Президенти буни қилиб бўлгани сабабли, биз ҳозирча қилмаслик қарори олдик.