Дунё совуқ урушдан ҳақиқий урушга кетаётгандек кўринаётган бир пайтда давлат раҳбарларининг мулоқоти мутлақо керакдир. Аммо, бу мулоқотлар ҳақиқий урушга кетиш жараёнларига қанчалик таъсир кўрсатаётганини билиш ҳам керак.

Кеча Россия Президенти Владимир Путин Сочидаги қарогоҳида Германия Канцлери Ангела Меркел билан учрашгач, улар биргаликда матбуот конференцияси ўтказдилар. У ерда ҳеч нарса очиқча айтилмади. Тўғри, учрашувда энг катта эътибор Украина ва Суриядаги муаммоларга бағишлангани айтилди, аммо бу икки масалада тарафлар орасида озгина бўлса яқинлашиш бўлгани айтилмади. Демак, ҳеч нарса ўзгармаган, ҳақиқий урушга кетиш давом этаверади.

Хўш, бугун Владимир Путин билан Россиянинг бош душмани ҳисобланадиган НАТО аъзоси Туркиянинг Президенти Ражаб Эрдўғон учрашувидан қандай натижа чиқади? Минг афсуски, ҳеч нарса чиқмайди. Чунки, Россия-Туркия муносабатлари тамомийла икки юзламачиликка асосланмоқда. Бу икки мамлакат стратегик ҳамкорлик қилолмайди, айниқса, 16 апрелдаги референдумдан кейин Туркияда исломлашиш кучайиши муқаррар эканлигини ҳисобга олсак, ҳеч қандай стратегик ҳамкорлик бўлиши ҳам мумкин эмас. Тўғри, икки тараф ҳам буни яхши тушунади, аммо икки тараф ҳам иккиюзламачиликка асосланган ҳамкорликдан бугунги манфаатлар нуқтаи назаридан фойда чиқариб олиш ҳаракатида.

Аммо, тушуниш керакка, катта сиёсатдаги бундай иккиюзламачилик иккала давлатнинг ҳам ҳалокатини тезлаштиради, холос. Бу кетишда келажакда Россия ҳам, Туркия ҳам парчаланиб кетади, бу парчаланиш дунёнинг супер давлатига айланиш ҳаракатида бўлган Хитой учун яхши бўлади.

Хўш, нима қилиш керак? Ҳозир дунёнинг мотори бўлган Ғарбда ҳозирги шароитда кўр-кўрона демократияга асосланиш - демократиянинг душмани бўлганларга, жумладан, Хитой ва ислом фанатикларига қўл келаётганини тушуниб етишлари ва демократияга асосланган янги стратегик йўлларга ўтишлари керак.