Ҳа, бугун Ўзбек шеъриятининг отахони Алишер Навоий туғилган кун. Ўзбеклар ҳамма ерда бу кунни байрам қиладилар. Аммо, бугун байрам қилиш эмас, унинг “Одам эрсанг демагил одами, Оники йўқ халқ ғамидин ғами” сўзларини эслаш куни бўлиши керак. Уларни эсласак, кунимизнинг аччиқ ҳақиқатларига қарашга мажбур бўламиз. Аччиқ ҳақиқат эса, жумладан, қуйидагилардан иборат.

Алишер Навоий 1441 йилда туғилиб, 1501 йилда оламдан ўтган Ҳирот шаҳрида ўзбекча мактаб йўқ. Ўзбек миллатининг бу билан иши ҳам йўқ. Нима қилиш керак?

Ўзбек халқи шу аҳволдаки, 2010 йил июнь ойида қирғиз фашистлари ўзбекларни тириклайин ёқдилар, ўзбекнинг қиз-аёлларини подалашиб зўрлардилар, 3 кунда 300 ўзбекни ваҳшийларча ўлдирдилар ва ўша воқеалар бўйича юзлаб ўзбекларни зиндонларга ташладилар. Дунё бўйича сони 30 миллиондан ошган ЎЗБЕК миллати бунақа майда-чуда нарсаларга эътибор бермайдиган даражада пасткаш эканлигини кўрсатиб берди. Навойининг “Одам эрсанг демагил одами, Оники йўқ халқ ғамидин ғами” сўзларидан келиб чиқсак, одам эмаслигини исботлаб берди. Энди нима қилиш керак?

Шундай савол қаршимизга чиқар экан, тўйда ҳам, азада ҳам, улуғ Навоийнинг туғилган куни ҳам, ўз ғами билан иши бўлмган ўзбекларнинг кимлиги ҳақида гаплашишимиз керак. Ўзбекларни ўз ғами ҳақида ўйлайдиган миллатга айлантириш йўлида яна бир қадам бўлса ҳам олға кетишимиз керак.

Акс ҳолда улуғ бобомизнинг жаннатдаги ҳаётини ҳам жаҳаннамга айлантирамиз.