28 August 2014
21:41 - Украинада нима бўлаётганини тушуниш қийин, аммо Путин урушда ташаббусни қўлга олмоқчи
Украинанинг Донецк ва Луганск вилоятларида руспараст-терористлар билан Украина қўшинлари ўртасидаги уруш, аслида, Россия-Украина ўртасидаги уруш эди. Аммо, Россия тўғридан-тўғри урушга кирмасдан, ўз олдамларидан иборат бўлган сепаратистлар қўли билан уруш олиб борар эди. Бу урушда Украина ҳарбийларининг қўли баланд келаётгани, улар ҳатто Донецк ва Луганск шаҳарларини қўлга киритиш учун тайёргарлик кўраётганларини ҳамма биларди. Путин билан Порошенконинг 26 август куни Минскда бўлиб ўтган учрашуви ҳам ҳеч қандай натижа бермади.

Турли тарафдан келаётган хабарлардан тўла хулоса чиқариш ҳам қийин, аммо кўринишидан, Путин ўз армиясини Украинадаги урушда тўғридан- тўғри киритишга қарор қилди. Рус десантлари Украинага ташлангани ва улар урушга кириб бўлганини НАТО ҳам айтмоқда. Баъзи жойларда русларнинг қўли баланд келишга бошлагани ҳам айтилмоқда.

Лекин, ҳақиқий аҳвол тўла маълум эмас. Украина тарафида паника ҳам йўқ. Ҳамма нарса яқин кунлар, ҳатто, яқин соатлар ичида аниқланиши мумкин.
« Олдинги хабар Хабарлар рўйхати Кейинги хабар »