25 July 2014
02:45 - Бечора Путин синган тишларини кўрсатмоқда: Мухолифатчилар Сергей Удальцов ва Леонид Развозжаев 4,5 йилга озодликдан маҳрум этилди
Бу икки мухолифатчи 2012 йили май ойида Владимир Путиннинг инаугурацияси муносабати билан Москванинг Болотная майдонида ўтказилган норозилик намойишларини оммавий тартибсизликлар деб баҳолаган Москва шаҳар судининг кечаги ҳукми билан 4,5 йилдан қамоқда ўтирадилар. Табиий, унгача Путиннинг режими оёқда қололса.

Эслатиб ўтиш керакки, 2011 йилнинг охири ва 2012 йилнинг бошларида Россиянинг мухолифатчилари жуда катта намойишлар ўтказдилар ва кучларини кўрсатдилар. Аммо, Путин президентлик курсисига ўтиргандан кейин мухолифатга қарши ростакам уруш бошлади ва ҳозирги босқичда уни нейтраллаштиришга эришди.

1977 йилда туғилган Сергей Удальцов (расмда) сўлчи сиёсатчи, «Сўл Фронт» ташкилотининг лидери бўлиб, ўтган йилнинг февраль ойидан бери уй ҳибсида эди.

1973 йилда туғилган Леонид Развозжаев «Сўл Фронт»нинг асосчиларидан, раҳбариятининг аъзоси. Давлат Думасининг депутати Илья Пономаревнинг ёрдамчиси.

Айниқса Украинадаги воқеалардан кейин Россия президенти Владимир Путин мухолифатни йўқ қилишни ўзининг асосий вазифаларидан бири деб ҳисобламоқда. У бечорани ҳам тушуниш мумкин. Ғарб киритган ва киритаётган санкциялар таъсирида Россияда иқтисодий аҳвол ёмонлашиши муқаррар, норозлик кайфияти ҳам кучаяди. Мухолифат бундан фойдаланиб, яна ҳам кучлироқ чиқишлар қилишидан қўрққан Путин, мухолифат лидерларининг оёқ-қўлини синдирмоқчи. Лекин, у тушунмайдики, халқнинг норозилиги ошса, дарҳол бошқа лидерлар ўртага чиқади. Қамоқдагилар эса у ердан қаҳрамон бўлиб чиқади.
« Олдинги хабар Хабарлар рўйхати Кейинги хабар »