20 September 2019
01:24 - Ўзбеклар кўзингизни очинг: 2019 йилнинг 1-чи ярмида муҳожирларимиз Россиядан Ўзбекистонга 2 миллиард доллардан кўп пул юбордилар
Россия Марказий Банки тарқатган маълумотларга кўра, жорийдаги йилнинг биринчи ярмида Россияда ишлаётган ўзбекистонлик муҳожирлар Ўзбекистонга 2 миллиардан кўпроқ пул юборибдилар. Ўтган йилнинг шу даврида 1,8 миллиард доллар юборилган экан.

Марказий Осиёнинг бошқа давлатларига Россиядан юборилган пул қуйидагича:

- Тожикистон: $1,1 млрд
- Қирғизистон: $935 млн
- Қозоғистон: $268 млн

Қаранг, бу кетишда, йилнинг 2-чи ярмида ҳам Россиядан шунча пул келса, ҳаммаси бўлиб бу йил $4,5 миллиард атрофида пул келган бўлади. Бизда Давлат Бюджетининг даромад қисми 2018 йилда $7,7 миллиард бўлганини, 2019 йилнинг Давлат Бюджети ҳатто эълон қилинмаганини, аммо $8 миллиард атрофида бўлишини тахмин қилиш мумкинлигини ҳисобга олсак, Россиядан келган $4,5 миллиард пул Давлат Бюджети даромад қисмининг ярмидан ҳам кўпроқ бўлади. Бу дегани, Ўзбекистон давлат сифатида ўлиб бўлди деганидир.

Аввал хабар берганимиздек, Россиянинг расмий идоралари билдиришича, Ўзбекистондан Россияга борган меҳнат муҳожирларининг сони 3 йилдан бери ортиб бормоқда. 2017 йилда 1,9 млн эди, 2018 йилда 2 млн, 2019 йилнинг июль ойида 2,1 млн бўлди. Кўрдингизми, Ўзбекистоннинг 33 миллионлик аҳолисидан бор-йўғи 2,1 миллиони Россияда ишлаб, Ўзбекистонга Давлат Бюджети даромад қисмининг ярмидан кўпроқ пул юбормоқдалар. Бу ерда ҳам, Ўзбекистон давлат сифатида ўлиб бўлганини қайтариш керак.

Эътибор беринг, Шавкат Мирзиё ҳокимиятга келиб, гўёки катта лойиҳалар бошлагандан бери, Ўзбекистондан меҳнат муҳожири сифатида Россияга қочаётганларнинг сони ортиб бормоқда. Бошқа мамлакатларга қочиш ҳам шу каби ортиб бораётгани шубҳасиз. Чунки, бошқа мамлакатларда муҳожирлар Россиядагидан ҳам кўп пул топмоқдалар.

Шулардан тушунаверингки, “Бирлик” Халқ Ҳаракати Партияси ва унинг жарчиси “Ҳаракат” Агентлиги йиллардан бери айтиб келаётганидек, Ўзбекистонда аҳвол йил сайин ёмонлашиб бормоқда. Шавкат Мирзиёнинг тутзорларни кенгайтириш, аччиқ гармдори экиш, чет эллардан Ўзбекистонга инвесторлар олиб келиш чақириқлари ҳеч қандай ижобий натижа бераётгани йўқ, бермайди ҳам. Чунки, Ўзбекистон косметик эмас, ФУНДАМЕНТАЛ ислоҳотларга муҳтож.
« Олдинги хабар Хабарлар рўйхати Кейинги хабар »