АҚШда ишлайдиган ва кўпчилик билмайдиган The Hill.com Интерент нашри 26 июль куни кечқурун қисқа хабар қилишича, АҚШ Давлат Депараменти пойтахт Вашингтонда биринчи марта Диний Эркинликлар бўйича Вазирлар Конференцияси ўтказибди. Хабарда конференцияда қайси давлатларнинг қайси вазирлари иштирок этгани мутлақо тилга олинмайди. Яъни, масхарабозлик шундан бошланади.

Хабарда асосий урғу 26 июлда Давлат Котиби Майк Помпео шу Конференцияда қабул қилинган Потомак (Вашингтон олдидан ўтадиган дарёнинг номи) Декларациясини ўқиб эшиттирибди. Қисқа хабарда айтилишича, бу Декларацияда ҳамма динларга тўла эркинлик бериш шартлиги урғуланибди. Майк Помпео дин эркинлиги Президент Доналд Трампнинг сайловолди ваъдаларидан бири эканлигини, ҳозир Доналд Трамп ва унинг тақими ўша ваъдаларни бажариш ҳаракатида эканлигини алоҳида урғулабди. Бу нарса - масхарабозликдир. Чунки, айнан Доналд Трамп сайловолди кампанияси даврида мусулмонларни АҚШга киритмаслик ваъдасини берган ва президент бўлгандан кейин бир неча марта мусулмонларнинг АҚШга келиши йўлида тўсиқлар қўйувчи қонун ва қарорлар имзолган, аммо АҚШнинг судлари унинг қарорларини бекор қилишган эди.

Аммо, Конференция ва гўёки унда қабул қилинган Декларациянинг асосий масхарабозлиги бошқа нарсада. Қаранг, Декларацияда ҳамма динларга тўла эркинлик бериш айтилмоқда. Бошқа динларни қўйиб турайлик ва Ислом дини масаласини кўрайлик. Ислом динига кўра, мусулмонлар Шариат қонунлари билан яшашлари керак. Шариатга кўра эса, мусулмон эркаклар 3 та хотинли бўлишга ҳақлари бор, майда ўғриларнинг кафти кесилиши, каттароқ жиноят қилганлар тош бўрон қилиб ўлдирилиши керак. Бундан ҳам муҳими давлат исломий бўлиши, исломий давлатлар Халифаликка бирлашиши, келажакда бутун инсоният мусулмон бўлиши керак. Ҳозир террорист деб тан олинган Ал-Қоида, Толибон, ИШИД ва бошқа ташкилотларининг мақсади Ислом динининг айнан шу талабларни ҳаётга тадбиқ қилиш-ку.

Бу масхарабозлик халқасидан, тўғрироғи, боши берк кўчадан чиқишнинг ягона йўли “Бирлик” Партияси ва унинг жарчиси бўлган “Ҳаракат” агентлиги тарафидан йиллардан бери айтиб келинмоқда. Бу йўл – Ислом динида фундаментал ислоҳотлар ўтказиш ва Ислом дини дунёвийлик/секуляризм принципини қабул қилишига, Қуръоннинг 8 асрда қилинган хато тафсиридан келиб чиқувчи хато тушунчалар бекор қилинишига эришишдир.

Ҳозир АҚШда 2016 йилдаги президент сайловларига Россия аралашиб, Доналд Трампнинг ғалаба қозонишига ёрдам бергани ҳақидаги иддаолар атрофида тарихда бўлмаган масхарабозлик ўйинлари кетмоқда. Уларнинг соясида қандайдир Диний Эркинликлар бўйича Вазирлар Конференциясининг масхарабозликларига АҚШда ҳеч ким эътибор ҳам бермоқчи эмас.

The Hill.com сайтининг хабарига биттагина Майк Помпеонинг расми қўйилган. Биз ҳам уни олдик.