04 October 2017
15:17 - Бу дунё шунақа ўзи: Қирғинчи-террорист нимага бундай қирғин қилганинининг сабабларини тополмаётган Лас-Вегас полициясининг боши қотмоқда
Якшанба куни, яъни 1 октябрда Лас-Вегас шаҳри марказидаги майдонлардан бирида бўлаётган концерт тамошабинларини шу майдон четидаги меҳмонхонанинг 32-чи қаватидан ўққа тутиб, 58 ёки 59 кишини ўлдирган, тахминан 500 кишини ярадор қилган 64 ёшли Стивен Пэддок (Stephen Paddock) нимага бундай ишга қўл урганини тушунолмаётган давлат органларнинг боши қотгани ҳақида хабарлар тарқатилмоқда. Бу воқеа – АҚШнинг тарихидаги энг “қонли қирғин” бўлганлиги айтилмоқда.

Лас-Вегас террористи ўтган йили 33 та қурол сотиб олган, унинг ҳаммаси бўлиб 50 га яиқин қуроли бўлган. Террористнинг ўзи уларнинг анчасини яна ҳам тез отадиган қилиб мукаммалаштирган экан. Яъни, у Лас-Вегасдаги террорига узоқ вақт ва жуда пухта тайёрлангани шубҳасиз.

У хотини билан анча йиллар илгари ажрашган, уларнинг фарзандлари бўлмаган. Охирги йўлларда Мэрилу Дэнли (Marilou Danley) исмли, асли филиппинлик аёл билан расмийлаштирилмаган, ҳозир кўп ишлатиладиган ифода билан айтсак, “фуқаролик хотини” сифатида яшаган. Қирғин кунидан аввалроқ у хотин ўз мамлакати Филиппинларга кетган, ўша пайтда Стивен Пэддок Филиппинлардаги қандайдир банк ҳисобига 100 минг доллар пул ўтказган экан. Бу пул Мэрилу Дэнли учун юборилгани тахмин қилинмоқда. Қирғиндан кейин у хотин Лас-Вегасга қайтиб келди ва ҳозир тергов органларига ўз истаги билан керакли кўрсатмалар бермоқда.

Хуллас, хабарларга кўра, бу қирғин-террорнинг сабабларини тополмаётган полициянинг боши қотмоқда эмиш. Аслида, бош қотиришнинг ҳам кераги йўқ - бу дунё шунақа ўзи. Демак, дунёни ўзгартириш керак.

Ўтган йилги сайловолди кампанияси даврида оддий фуқароларнинг қуролга эга бўлиш ҳақларини тиш-тирноғи билан ҳимоя қилган Доналд Трамп террористни “касал ва жинни одам” деб баҳолади ва одамларда қурол бўлиши масаласини кейинроқ муҳокама қиламиз деди. Бугун Доналд Трамп Лас-Вегасга келиши кутилмоқда. У кеча АҚШнинг ярим расмий ҳудуди ҳисобланадиган Куба билан чегарадош Пуэрто-Рикога келиб, яқинда Атлантик океандан келган бўрон остида катта ҳалокатларга учраган ярим-ватандошларига ҳамдардлик билдирди, керакли ёрдам берилиши ҳақида ваъдалар берди.

Расмларда - Мэрилу Дэнли ва Стивен Пэддок.
« Олдинги хабар Хабарлар рўйхати Кейинги хабар »