21 June 2017
18:11 - Бечора Нурсултон: Қозоқларнинг президенти Остона аэропортига ўз номини бердирди. “Ҳаракат”: У ўз исми-шарифидан “-ов”ни отса, яхшироқ бўларди
Қозоғистон ҳукуматининг кеча қабул қилиб, бугун эрталаб эълон қилинган хабари пойтахт Остонадаги Халқаро Аэропортга жорийдаги Президент Нурсултон Назарбоевнинг номини бериш ҳақидадир. Аммо, ёш бола ҳам тушунадики, бу қарор - Нурсултон Назарбойнинг қарори, фақат ҳукумат номидан эълон қилинган.

Қозоғистонда Нурсултон Назарбойнинг диктатураси ўрнатилгани, аммо у диктаторлик ваколатларини ҳеч қандай давлатчилик тажрибаси ва анъаналарига эга бўлмаган қозоқ халқини оёққа турғазиш учун сарфлаётганини “Ҳаракат” доим эътироф қилиб келарди. Аммо, унинг аэропортга ўз номини бериш қарори - ҳар қандай чегарадан чиқиб кетишдир. Биз йиллардан бери вақти келиб Остона шаҳрининг номи “Нурсултон” бўлишини башорат қилмоқда эдик ва кўринишидан айнан шундай бўлади. Нурсултон Назарбой нега бунчалик шошиб қолиб, ишни аэропортга ўз номини беришда бошлаганининг сабабини тушуниш қийин.

Аслида, Нурсултон Назарбой ҳозир бошқа бир янгиликни бошлаб, ўзининг расмий исми-шарифи “Нурсултон Назарбоев”ни биз аллақачон ишлатаётган “Нурсултон Назарбой” шаклига ўтказса яхши бўларди. Бу нарса қозоқларнинг ростакам мустақиллигини яна бир марта урғулайдиган қадам бўлишдан ташқари, миллат сифатини йўқотиб бўлган ўзбеклар учун ҳам чиройли сигнал бўларди.
« Олдинги хабар Хабарлар рўйхати Кейинги хабар »