05 March 2017
05:11 - Қизиқ: Афғонистондаги фатхулла-гуленчиларнинг мактаблари Туркиядаги Маориф Вақфига берилади
Туркиянинг энг катта Миллиёт газетаси хабар беришича, Афғонистон ҳукумати бу мамлакатда фатхулла-гуленчилар тарафидан яратилган мактабларни Туркиянинг Маориф Вақфига ўтказиш учун махсус комиссия тузибди. Кеча бу комиссия шу масала бўйича матбуот конференцияси ҳам ўтказибди.

Афғонистонда фатхулла-гуленцичларнинг қанча мактаби борлиги, у мактаблар нима учун Маориф Вақфига, феълан Туркия ҳукуматига ўтказилаётганининг сабаблари хабарда айтилмайди. Аммо, шундоқ ҳам тушунарлики, Туркия ҳукумати фатхулла-гуленчилар билан уруш деса бўладиган қарама-қаршиликка киргани сабабли, бу жамоанинг бошқа давлатлардаги мактабларини тортиб олиш йўлидан кетилмоқда. Бу йўл – тўғри йўлдир.

Аммо, муҳим бўлгани, бу мактабларнинг ўзида қандайдир ўзгаришлар бўладими? Бўлмаса керак, дейди мухбиримиз, улар Ражаб Эрдўғон жамоасининг қўлига ўтиб, ислом фанатизми ва экастремизмининг ўчоқлари бўлиб қолаверадилар. Аввалари ҳам кўп марта айтганимдек, фанатизм ва экстремизм билан терроризм ораси бир энликдир.

Юқорида айтилган комиссия эса, Афғонистон Президенти Ашраф Ғанининг топшириғи билан Таълим, Ташқи Ишлар, Иқтисод ва Адлия вазирликларининг ҳамда Миллий Хавфсизлик Кенгаши ва Миллий Истиҳборат (русча - Разведка) Ташкилотининг вакиллари иштирокида тузилган экан. Миллий Хавфсизлик Кенгаши ва Миллий Истиҳборат Ташкилотининг вакиллари ўша комиссиягя кирилганидан ҳам тушуниш мумкинки, бу мактаблар идеология ўчоғи эканлигини Афғонистон раҳбарлари ҳам тушунадилар.

Маълумки, Ўзбекистонда фатхулла-гуленчиларнинг мактаблари аллақачон ёпиб ташланган, уларни битиргандан кейин экстремизм йўлидан кетаётгани иддао қилинаётган бир қатор ўқувчилар тазйиқ остига олинган, баъзилари қамоққа ҳам ташланган эди
« Олдинги хабар Хабарлар рўйхати Кейинги хабар »