11 December 2016
16:25 - Туркияда навбатдаги даҳшатли теракт: 38 киши ҳалок бўлди, ярадорлар сони 155, уларнинг 6 нафари оғир аҳволда
Кеча кечқурун Истанбулнинг марказидаги Бешиктош номли қисмида яқинда қурилган Водафоне Арена стадионида Бешиктош ва Бурсаспор футбол тақимларининг ўйини бўлди. Ўйиндан кейин, тамошабинлар тарқалиб бўлгач, йўлда кетаётган автомобил стадион атрофида тинчликни сақлаш бу ерга келган полициячилар тўла автобус олдида портлади. 45 дақиқадан кейин бошқа бир бомбали террорист яна полициячилар гуруҳига яқинлашиб ўзини ўзи портлатди. Кўринишида террористларнинг нишони айнан полициячилар бўлган.

Икки портлаш натижасида 38 киши ҳалок бўлди, уларнинг 30 нафари полициячи, 7 нафари шу ердан ўтаётган ва тасодифан ҳужумга учраганлар, 1 кишининг кимлиги аниқланмабди. Ярадорлар сони 155, уларни 6 нафарининг аҳволи оғир, 3 нафарининг аҳволи жуда оғир эканлиги расмий хабарларда айтилган.

Шубҳали 13 киши қўлга олинибди. Бош вазир Бинали Йилдиримнинг айтишича, ҳозир террорни ким уюштирганини аниқлаш учун керакли ишлар олиб борилмоқда, лекин ҳозирги маълумотларнинг ўзиёқ терактни курд террористлари, яъни ПККчилар уюштирганини кўрсатмоқда.

Туркия Президенти Ражаб Эрдўғон бугун Истанбулда ҳалок бўлган полциячиларнинг жанозасига қатнашди, кейин Ҳасеки касалхонасига бориб, кечаги терактларда ярадор бўлганларни зиёрат қилди. Касалхонада у билан бирга куёви, Энергетика ва Табиий Манбалар вазири Берат Албайроқ, Ташқи ишлар вазири Мевлут Човушўғли ва Истанбул губернатори Васип Шаҳин бор эди. У касалхонадан чиқишда ўзини кутаётган журналистлар билан гаплашди, баёнот берди.

Ражаб Эрдўғон ПККчиларнинг ҳамма ўрганиб қолган террористик ҳужумларидан кейин кўп марта гапирган гапларини такрорлади, десак ҳам бўлаверади. У бундай терактлар ҳеч кимни синдиролмаслигини, террористларга керакли жавоб берилишини, улар буни билишлари кераклигини урғулади.

Туркияда оммавий ахборот воситаларига бу терактлар бўйича расмий хабарлардан бошқа нарса тарқатмаслик буйруғи берилди.

Оқ Уй, Кремль ва жуда кўп давлатларининг раҳбарлари Истанбулдаги терактни қораловчи ва Туркия халқига ҳамдардлик билдирувчи баёнотлар тарқатганлари хабарларда айтилмоқда.
« Олдинги хабар Хабарлар рўйхати Кейинги хабар »