20 July 2016
08:00 - Сенсация эмас: Абдураҳим Пўлат ва “Ҳаракат” яна ҳақ чиқди, Доналд Трамп Республикачилар Партиясининг президентликка расмий номзоди бўлди
18 июлда АҚШнинг Охайо штатидаги Кливленд шаҳрида иш бошлаган Республикачилар Партиясининг қурултойи кеча, яъни 19 июль куни, маҳаллий вақт билан кечқурун Доналд Трампни шу йил 8 ноябрда бўладиган президентлик сайловларида иштирок этиш учун ўзининг расмий номзоди қилди.

Аввалги хабаларимизда кўп марта айтилганидек, қурултойнинг бундай қарорига эришиш учун камида 1 минг 237 делегатнинг овозини олиши керак эди, кеча қурултойда Доналд Трамп учун 1 минг 725 делегат овоз берди. Вице-президентликка номзод қилиб, Доналд Трамп тарафидан 16 июлда танланган Индиана штатининг жорийдаги губернатори Майк Пенс (Mike Pence) сайланди.

Демократ Партиянинг қурултойи ҳам яқин кунларда бўлади. Демократларнинг президентликка номзоди Ҳиллари Клинтон бўлиши аниқ. Демак, 8 ноябрдаги сайловда Доналд Трамп ва Ҳиллари Клинтон ўртасидаги жанг бўлади. Бошқа номзодлар ҳам бўлиши мумкин, аммо уларни ҳеч ким сезмай ҳам қолади.

Шуни алоҳида урғулаш ва эслатиш керакки, Доналд Трамп республикачиларнинг номзоди бўлиши аниқ эканлигини “Бирлик” Партияси раиси Абдураҳим Пўлат ва бу партиянинг жарчиси бўлган “Ҳаракат” Агентлиги ойлардан бери айтиб келмоқда эди. Ўша пайтда, бошқаларни қўйиб туринг, бу партиянинг раҳбарияти ҳам Доналд Трапмнинг номзод бўлишига қарши эдилар.

Абдураҳим Пўлат ва “Ҳаракат”нинг башорати сенсация эмаслигини урғулашимизнинг сабаби – уларниннг ҳар қандай башоратлари амалга ошавериши оддий воқеа бўлиб қолганидир. 8 ноябрдаги сайловда Доналд Трамп ғалаба қозониши ҳақидаги башорат ҳам тўғри эканлигини ўша куни кўрамиз.

Дарвоқе, аввалги хабарларимизда Reuters Агентлиги ўтказган сўровномаларнинг натижаларига кўра, ҳозирча америкаликлар ўртасида Ҳиллари Клинтонга овоз бериш истагидагилар кўпчиликни ташкил қилаётгани, аммо фарқ камайиб бораётганини билдирган эдик. Аввалига фарқ 13 фоиз эди, 15 июлдаги сўровномаларга кўра, бу фарқ 7 фоиз бўлибди.

Хуллас, ҳақиқий хабар “Ҳаракат”да ўқилиши кераклигини энди америкаликларга ҳам ўргатиш керак.
« Олдинги хабар Хабарлар рўйхати Кейинги хабар »