15-чи июлдан 16-чига ўтар кеча Туркияда давлат тўнтариши қилиш ниятидаги ҳарбийлар исёни бўлганига ҳеч қандай шубҳа йўқ. Исён бошланар-бошланмас, қаердадир бекиниб ётган Президент Эрдўғон исён Фатхуллачи Террористик Ташкилот тарафидан уюштирилганинини айтди. “Ҳаракат” ҳам бу иддаонинг қабул қилди. Аммо, кейинги хабарлар бу иддао ишончга лойиқ эмаслигини кўрсатди. Фатхулла Гуленнинг ўзи бу терактни қоралаши, бу воқеаларни текшириш учун халқаро комиссия тузиш кераклиги ва у бундай комиссиянинг ҳар қандай ҳукмини қабул қилишга тайёр эканлигини билдириши ҳам ҳар қандай одамни ўйлантириб қўйиши керак.

Бу исён бир неча сооатда халқнинг ёрдами бостирилди. Бу олқишга сазовордир. Аммо, бошқа турли “аммо”лар бор.

Давлат тўнтариши қилишга ҳаракат бошлаганлар ҳар нарсага, ҳар қанча қон тўкилишига тайёр одамлар бўлиши керак эди. Аммо, улар майдонларга чиққан одамларга қирғин қилишдан чекиндилар ва таслим бўлдилар. Шундай инсонпарвар террористларни кўрганмисиз?

Исён бошлар-бошланмас, Фатхулла Гулан ва бошқа тахминан 30 кишига қарши умрбод қамоқ жазоси бериш талаби билан жиноий иш очилгани эълон қилинди. Яъни, мавжуд ҳукумат масхарабозлигини кўрсатди.

Кейин, бундан ҳам “жиддийроқ” ишлар бошланди. Мана баъзилари.

Бир неча минг ҳарбий ҳибсга олинди, уларнинг ичда 100 га яқин генерал ва адмирал бор. Улар жазоланиши керак. Аммо, улардан биронтасининг фатхулла-гуленчиларга ўхшашлигини кўрсатувчи биронта ҳам факт йўқ. Улар халқнинг қонини тўкмаслик учун, юзага келган вазиятда, қўлларидан келган ҳамма нарсани қилганларини кўрмаслик мумкин эмас.

Ички ишлар вазирлигининг бир неча ўн минг ходими ишдан бўшатилди, уларнинг кўпчилиги устидан жиноий ишлар очилди.

Вазирлар Маҳкамасидан юзларча одам ишдан бўшатилди, уларга қарши жиноий ишлар очилиши кутилмоқда.

Адлия вазирлиги ва полициядан минглаб одамлар ишдан бўшатилди. Уларга қарши ҳам жиноий ишлар очилса керак.

Таълим вазирлиги таркибидаги мактабларда дарс берувчи 30 мингга яқин ўқитувчи ишдан бўшатилди ва улар бундан буён дарс бериш ҳаққидан маҳрум қилиндилар.

Бу рўйхатни давом эттириш мумкин, аммо кераги йўқ. Ҳамма нарса шу ерданоқ кўриниб турибди.

“Бечора” Сталин гўрида ўрнидан туриб, оммавий репрессия қилишни турклардан, тўғрироғи, ҳозир ҳокимиятда бўлган Адолат ва Тараққиёт Партиясидан ўрганишим керак экан-ку, деб ўйлаётган бўлса ажаб эмас.

Тўғри, Фатхулла Гелен ва унинг жамоати ўта реакцион исломчилар бўлиб, уларнинг мақсади (худди Эрдўғонники каби) Туркияни шариат қонунлари бўйича яшайдиган исломий давлатга айлантириш, кейин ИШИДдан ҳам кучли бўлган Халифалик қуришдир. Уларни куч билан бўлса ҳам тўхтатиш керак. Аммо, икки гуруҳ ўртасидаги ҳокимият учун курашни тарафлардан бири Сталиннинг усуллари билан олиб боришга киришгани кулгили ва ачинарлидир. Чунки, ташқарида ўтган асрнинг 37-чи эмас, 21 асрнинг 16 йили давр сурмоқда.

Интернетда Сталиннинг Эрдўғон билан тушган расмини тополмаганимиз сабабли, Путин билан тушган расмини хабаримизга илова қилмоқдамиз.