25 May 2016
08:20 - Жуда қизиқ: АҚШнинг Флорида штатидаги Майами Университетида атеизм кафедраси очилди
Нью-Йорк Таймс газетасининг 20 майда эълон қилинган мақоласига кўра, Луи Аппиджиани (Louis Appignani) исмли, 83 ёшдаги бой атеистнинг 2.2 миллион долларлик хайрияси билан шу йил апрель ойининг охирида Майами Университетида атеистик тадқиқотлар олиб борадиган махсус бўлим, яъни кафедра очилибди. Газетанинг мухбири Лаура Гудстейн (Laurie Goodstein) ёзишича, университетнинг ўзи бу ҳақда ҳали расмий хабар тарқатмаган.

Ўзи атеист бўлган Луи Аппиджиани бу ишига қуйидагича изоҳ берибди: “Мен атеистларни дискриминация қилишни чегаралаш ҳаракатидаман. Яъни, менинг мақсадим атеизмни қонунлаштиришдир.”

Мақолада айтилишича, атеистларнинг аҳоли ичидаги фоизи 2007 йилдаги 16 дан, 2014 йилдаги 23 га кўтарилган мамлакатда бундай кафедра очилиши табиий эмиш. Pew Research Center номли жамоатчилик фикрини ўрганиш билан шуғулланадиган ташкилотга кўра, ёшлар ичида ўзини атеист деб ҳисоблайдиганлар 35 фоизга чиқибди.

Бундай кафедра очилишини очиқча қўллаб-қувватлаётган илм одамларининг фикри билан бир қаторда, бу масалада эҳтиёт бўлиш керклигини айтаётганларнинг фикри ҳам мақолада келтирилган.

Луи Аппиджиани (расмда) келиб чиқиши италиялик бўлган католикларнинг оиласида Нью-Йоркнинг Бруклин номли қисмида туғилиб ўсган, ёшлигида диний мактабда ҳам ўқиган экан. У Нью-Йоркдаги коллежда ўқиётган йиллари англиялик философ, Нобель мукофоти лауреати Бертран Расселнинг китоблари таъсири остида атеистга айланган.
« Олдинги хабар Хабарлар рўйхати Кейинги хабар »