60 йилча аввал Куба билан ҳамма алоқаларини узган, Кубадаги коммунистик режимни йиқитиш учун тинч йўллар билан ҳамма нарсани қилган, бу мамлакатга қарши мисли кўрилмаган санкциялар киритган, аммо ҳеч нарсага эришолмаган АҚШдан саёхатчиларни ташувчи саёхат кемаси – круиз кемаси кеча, 2 май куни Гаванага келиши оламшумул сенсация бўлиши керак эди. Аммо, бўлмади, чунки, АҚШ бир-икки йил аввал бу давлат билан алоқаларни тиклашга бошлаган ва ўткан йили Куба билан расман дипломатик алоқалар ўрнатилганди. Вашингтонда Кубанинг, Гаванада АҚШнинг элчихоналари очилган.

Шундай экан, Гаванага АҚШ круиз кемасининг келиши оддий воқеа бўлмаса ҳам, сенсация эмас. Расмда кўриб турганингиздек, бу кемани кутиб олиш тантаналари бўлгани йўқ, чунки Куба режими ҳалигача АҚШга анча совуқ муносабатда. Аммо оз сонли бўлса ҳам, бир гуруҳ оддий кубаликлар кемани соҳилдан туриб олқишлаётганлари диққатга сазовордир.

Аслида, АҚШ-Куба алоқаларининг илишига сабабчи “Бирлик” Партияси бўлган. Эслатиб ўтамиз, “Бирлик” Партияси 2006 йил 6 ноябрда эълон қилинган баёнотида ЕИ раҳабарларига мурожаат қилиб, Ўзбекистон ва у каби диктаторликларни тaшқи дунёдaн изoляция қилиш ёки уларга қарши сaнкциялaр киритиш ўрнига, уларни Ғарб дунёсига интеграция қилиш муҳимроқ эканлигини таъкидлаган ва санкцияларнинг фойдасизлигини кўрсатувчи мисол сифатида Куба давлатини тилга олган эди. Бу баёнот “Ҳаракат” сайтида ўша пайтдаёқ эълон қилинган.

“Бирлик”нинг бу баёноти америкаликларга етиб борган-бормаганини билмаймиз. Аммо, 2012 йил 2 февралда “Бирлик” лидери Абдураҳим Пўлат ўша пайтдаги АҚШ Давлат Котиби Ҳиллари Клинтонга бошқа бир муҳим масала бўйича мактуб йўллаб, Кубага қарши киритилган санкцияларнинг фойдасизлигини ҳам тилга олган ва ўз хатига “Бирлик”нинг 2006 йилдаги баёнотини ҳам илова қилган эди. Ҳиллари Клинтонга ёзилган хат “Ҳаракат” сайтининг инглизча саҳифасида ўша пайтдаёқ эълон қилинган.

Айнан шундан кейин АҚШ Куба билан алоқаларни тиклаш йўналишида бир нарсалар қилишга бошлагани тарихий фактдир, буни ҳеч ким инкор этолмайди. 2014 йилнинг ўрталарида эса, бу икки мамлакат алоқаларни тиклаш бўйича келишганларини эълон қилдилар. 2015 йилнинг ўрталарида Вашингтонда Куба элчихонаси, кейин Гаванада АҚШ элчихонаси очилди. Шу йил 20 мартда эса, АҚШ Президенти Кубага расмий ташриф билан келди. Мана энди у ерга АҚШ круиз кемаси ҳам келибди.

Эндиги воқеалар қандай давом этишини ҳам тахмин қилиш қийин эмас. Агар АҚШ Куба билан чегараларини бутунлай очиб қўйса, кубаликлар АҚШга қочишни бошлайдилар, Ўзбекистон давлатининг бюджети Россиядаги мардикорларнинг пулига боғланиб қолгани каби, Куба ҳам АҚШга боғланиб қолади, бу ердаги коммунистик тузумнинг битиши тезлашади. Вақти келади, бу масаладаги “Бирлик”нинг роли борлигидаги хабар кубаликларга ҳам етиб боради. Улар, шубҳасиз, “Бирлик”га миннатдорчилик билдирадилар.